Мінздароўя падрыхтаваў пастанову, якая дазволіць не трымаць у бальніцы кантакты першага ўзроўню пасля атрымання адмоўнага тэсту. Гэтую інфармацыю падчас брыфінгу агучыла намесніца міністра аховы здароўя Алена Богдан.
«Даследаванні пацыентаў з пнеўманіямі праводзяцца вельмі старанныя — у тым ліку мы бяром цяпер не мазок, а макроту і прамыўныя воды бронхаў. Мы тэстуем не толькі цяжкія пнеўманіі на COVID-19, але і ўсе пнеўманіі сярэдняй ступені цяжкасці. Таксама сярод новых рашэнняў — Міністэрства аховы здароўя падрыхтавала пастанову, па якой кантакты 1 узроўню, пасля атрымання на 7-ы дзень адмоўнага тэсту, будуць выпісаныя на амбулаторнае лячэнне і назіранне да 14 дзён», — сказала Алена Богдан.