У Віцебску за няпоўны тыдзень ад пнеўманіі згарэў былы следчы па найважнейшых справах Віцебскай абласной пракуратуры, палкоўнік у адстаўцы, 58-гадовы Анатоль Высоцкі.
Былыя калегі расказалі «Нашай Ніве», што толькі ў панядзелак 30 сакавіка ён адкрыў бальнічны, а ўжо ў пятніцу, 3 красавіка, ім паведамілі пра запланаванае на нядзелю пахаванне.
У выніку публічнага развітання не будзе, бо прыйшоў пасмяротны аналіз на каранавірус — станоўчы…
Гэтую інфармацыю «Нашай Ніве» пацвердзіла жонка памерлага.
«Узялі аналіз — ён пацвердзіўся. Гэта не хаваецца. Як сталі вядомыя вынікі — пазванілі з санэпідэмстанцыі.
Нам цяпер тэсты гэтыя зробяць: зараз прыедуць апрацаваць кватэру, тэсты — і на ізаляцыю.
Мы ж не маглі нават падумаць, што ў яго станоўчы вынік! І адкуль жа я ведаю, дзе ён мог заразіцца?
Мы ж не ездзілі нікуды, на месцы былі. Я на работу і з работы, ну ў краму зайду. Ён таксама ў краму мог зайсці, на рынак, на лецішча — усё. А так ён дома сядзеў, пенсіянер, нікуды не выходзіў, не ездзілі нікуды.
Пачыналася з тэмпературы, тры дні патэмпературыў — 38. Ён сам звязваў гэта з простай прастудай, маўляў, быў на лецішчы, як ён казаў, дровы складваў, пратапіў, выбег на вуліцу — ну, можа, прадзьмула, прастыў ды прастыў… Падумаць не маглі, што ў нас можа быць нейкі каранавірус», — сказала «Нашай Ніве» жонка.
Са слоў жонкі, у палкоўніка Высоцкага была арытмія, ён быў сардэчнік.
Як вядома, каранавірусная інфекцыя дае ўскладненні ў форме пнеўманій. Асабліва цяжка яе пераносяць людзі старэйшага ўзросту, з хранічнымі захворваннямі. Па заразнасці каранавірус падобны да грыпу.
Чытайце таксама: «А мы працягвалі прымаць адпачываючых». У інфекцыёнцы памёр супрацоўнік санаторыя «Пралеска» ў Ждановічах
Сітуацыя ў Віцебску выклікала трывогу з другой паловы сакавіка, калі адтуль стала паступаць інфармацыя пра ненармальна вялікую колькасць пнеўманій. Улады спачатку называлі гэта чуткамі і пагражалі пакараннямі за распаўюджванне панікі.
31 сакавіка Віцебск стаў тэмай спаткання прэзідэнта Беларусі Аляксандра Лукашэнкі са старшынёй Савета Рэспублікі Наталлі Качанавай. Качанава пабывала ў Віцебску. «Сітуацыя абсалютна кіраваная, дактары разумеюць, што трэба рабіць», — было заяўлена на сустрэчы.
Тады ж, 31 сакавіка, улады пацвердзілі смерць заслужанага артыста Беларусі, акцёра віцебскага Тэатра імя Якуба Коласа 75-гадовага Віктара Дашкевіча. У яго быў выяўлены каранавірус.
Тэатр спыніў спектаклі. Паводле інфармацыі ўдавы Дашкевіча, па меншай меры, у пяці супрацоўнікаў тэатра запаленне лёгкіх, іх шпіталізавалі.
Акрамя таго, яшчэ дзве сям'і з Віцебска першымі заявілі, што іх родныя — 73-гадовая Аляксандра Чэпік і 58-гадовая Таццяна Хузеева — памерлі, будучы шпіталізаваныя з цяжкімі пнеўманіямі. Абедзве сям'і сцвярджаюць, што ім тэлефанавалі санслужбы і паведамлялі пра станоўчыя пробы на каранавірус. У дачыненні да Хузеевай Міністэрства аховы здароўя пазней абвергла гэтую інфармацыю. У Чэпік у пасведчанні пра смерць быў указаны каранавірус.
Акрамя таго, у Віцебску ад каранавіруса памёр 70-гадовы адстаўнік Уладзімір Сідараў, былы капітан флота.
Вядома таксама пра смерць ад пнеўманіі медсястры, што працавала ў бальніцы, дзе ляжаць хворыя на каранавірус. Што тычыцца яе выпадку, улады не далі інфармацыі адносна сувязі яе смерці з COVID-19.
Чытайце таксама: «Баяліся несці дадому сваю форму». Стала больш вядома пра 47-гадовую медсястру, якая памерла ў Віцебску
На жаль, афіцыйная інфармацыя пра колькасць пацыентаў з дыягназам «пнеўманія» у Віцебску і вобласці не публікуецца. Прыватным чынам медыкі кажуць пра тое, што пацыентаў з запаленнем лёгкіх у горадзе нашмат больш, чым звычайна ў гэты час года.
Аляксандр Лукашэнка 31 сакавіка на сустрэчы са старшынёй Савета Рэспублікі Наталляй Качанавай прызнаў, што ў Віцебскай вобласці назіраецца ўсплёск захворванняў, але не змяніў свайго стаўлення да пандэміі.
«Вы ў мяне чалавек мужны. Салдат такі, што і ў выхадныя адпрацавалі ў праблемным рэгіёне, роднай сваёй вобласці. Я не кажу, што там катастрофа нейкая, не. Проста Віцебская вобласць у нас заўсёды, і па клімаце іншая, і трохі зрушыўся гэты пік захворвання. Сёння там працуе міністр аховы здароўя, я накіроўваў яго туды і спецыялістаў, каб яны звярнулі ўвагу, прааналізавалі і зрабілі высновы».
У сваю чаргу, Качанава заявіла: «Сітуацыя абсалютна кіраваная. Дактары разумеюць, што трэба рабіць».
«Я доктарка, працую ў Віцебску ў бальніцы хуткай медыцынскай дапамогі. У нашым горадзе сітуацыя пачала выходзіць з-пад кантролю! Медыкі хутка не будуць даваць рады наплыву хворых. Шмат дактароў знаходзіцца ў бальніцах з запаленнем лёгкіх! Распаўсюдзьце гэтую інфармацыю ў сацыяльных сетках. Лічбы, тыя, што падаюць у СААЗ, абсалютна міфічныя», — напісала 30 сакавіка на сваёй старонцы «УКантакце» доктарка з Віцебска Наталля Ларыёнава. Пазней яе выклікалі ў пракуратуру, каб яна дала тлумачэнні пра гэты свой запіс.
У адрозненне ад іншых еўрапейскіх краін, у Беларусі не ўведзеныя афіцыйныя каранцінныя абмежаванні.
Усяго па стане на 4 красавіка ўлады Беларусі заявілі пра 440 пацверджаных выпадкаў каранавіруса і 5 смерцяў.
Тым часам па стане на ранак 5 красавіка СМІ апублікавалі 11 паведамленняў пра смерць ад каранавіруса са спасылкамі на родных памерлых ці на медыцынскі персанал ніжэйшага звяна. Гэтыя смерці адносіліся да жыхароў Віцебска, Мінска, Капыльскага раёна, а таксама супрацоўніка санаторыя ў Мінскім раёне, месца жыхарства якога не ўказвалася.
