Агульная смяротнасць у Беларусі за першы квартал бягучага года ў параўнанні з аналагічным перыядам 2019-га знізілася на 4%, а ад пнеўманіі — на 9%. Адпаведную статыстыку сёння на нарадзе ў Мінску агучыў Аляксандр Лукашэнка, піша БелТА.
Пры гэтым у студзені — сакавіку 2020 года ад хвароб сістэмы кровазвароту памерлі 18,5 тыс. чалавек, ад анкалогіі — амаль 5 тыс. Ад пнеўманіі за 3 месяцы гэтага года памерлі 254 чалавекі.
«У нас не проста хварэюць цяпер ад віруса, але і псіхоз жа. І ўсё адно падзенне (смяротных выпадкаў) амаль на 9% толькі ад пнеўманіі. А цяпер гэта наша галоўная праблема», — адзначыў ён.
Ён таксама агучыў інфармацыю, што за перыяд з 1 студзеня па 5 красавіка года ў Беларусі з-за знешніх прычын загінулі 860 чалавек — на 15 чалавек менш, чым у 2019 годзе. «Нагадаю: ад пнеўманіі — 254», — заўважыў Аляксандр Лукашэнка.
Кіраўнік дзяржавы ўдакладніў, што з названай колькасці каля 400 чалавек загінулі ў выніку самагубстваў, 85 — забойстваў, на пажарах загінулі 206 чалавек, у ДТЗ — 107. «У сярэднім па рэспубліцы па ўказаных вышэй прычынах за тыдзень гінуць 60-70 чалавек. З 30 сакавіка па 5 красавіка — амаль 70 чалавек. А ад каранавіруса — 13», — прывёў лічбы кіраўнік краіны.
«Я гэта да таго кажу, што не забывайце, што акрамя каранавіруса, пнеўманій у нас ёсць і іншыя хваробы. Гэта не значыць, што трэба аслабіць працу па гэтай галоўнай сусветнай праблеме. Не. Мы вызначыліся, як ніколі аб'ядналіся ў гэтай барацьбе і павінны выстаяць», — сказаў Аляксандр Лукашэнка.
