07.04.2020 / 18:07

У амбулаторыі Ждановічаў — два выпадкі пнеўманій у медперсанала. Шпіталізавалі і іх родных 1

Доктар-тэрапеўт і медыцынская сястра, якая з ёй працавала, ляжаць з пнеўманіямі. Тэсты на каранавірус астатніх работнікаў Ждановіцкай амбулаторыі ў Мінскім раёне адмоўныя.

Як расказалі «Нашай Ніве» ў Ждановічах, гэты выпадак, найхутчэй, не звязаны са шлейфам санаторыя «Пралеска», размешчанага ў тым самым аграгарадку. У амбулаторыі ўсё пачалося з хваробы ў сям'і, якая выклікала да сябе ўчастковую тэрапеўтку. Медсястра, хутчэй за ўсё, заразілася ад сваёй калегі-доктаркі.

Гэта было яшчэ ў сакавіку, калі ўлады Беларусі засцерагалі ад «панікі» вакол каранавіруса, а грамадства было мала інфармаванае пра яго небяспеку.

Абедзве жанчыны цяпер ляжаць у шпіталях. У адной з іх хвароба працякае даволі цяжка. Шпіталізавалі і іх родных.

Як расказала «Нашай Ніве» родзічка аднаго са шпіталізаваных сваякоў, яго перавезлі ў адну з бальніц Гродзенскай вобласці. Па яе інфармацыі, гэта адбылося таму, што ў мясцовых установах не было свабоднага месца.

Амбулаторыя працягвае працу, бо тэсты астатніх работнікаў — адмоўныя. Па сканчэнні 14-дзённага перыяду яны здадуць тэст паўторна.

Усяго ў амбулаторыі працуе пара дзясяткаў работнікаў, гэта малая ўстанова, якая дае толькі самую базавую дапамогу.

Хворых на пнеўманію жыхароў Ждановічаў шпіталізуюць у Мінскай раённай бальніцы ў Бараўлянах. Вядома, што памерлага работніка «Пралескі» пасля пацвярджэння каранавіруса стуль перавялі ў Мінскую інфекцыйную бальніцу.

Трывогу выклікае сітуацыя вакол санаторыя «Пралеска». Пасля смерці аднаго з тэхнічных работнікаў санаторыя, у якога выявілі каранавірус, стала вядома пра смерць і аднаго з пацыентаў, які там адпачываў. Сёння прыйшла інфармацыя пра шпіталізацыю з каранавірусам дырэктаркі школы з Барысаўскага раёна, якая праходзіла аздараўленне ў «Пралесцы» ў сярэдзіне сакавіка. Праблема ў тым, што санаторый працягваў прымаць пацыентаў і пасля выяўлення там першых хворых. Большасць адпачывальнікаў у «Пралесцы» складаюць людзі ў гадах.

Паводле афіцыйнай інфармацыі, Мінская вобласць на трэцім месцы пасля Мінска і Віцебшчыны па распаўсюджанні COVID-19. У вобласці вірус пацвердзіўся ў 92 чалавек, трое памерлі. Вядома пра групы выпадкаў у Капыльскім і Мінскім раёнах і адзінкавыя выпадкі ў Вілейцы, Уздзенскім, Барысаўскім, Стаўпецкім раёнах.

Хочаш падзяліцца важнай інфармацыяй ананімна і канфідэнцыйна?

Сяргей Гезгала

2
8888 / Адказаць
08.04.2020 / 00:37
Калісь адпачываў у гэтай "Пралесцы" - можа, гадоў 15 таму. Дагэтуль засталіся самыя непрыемныя ўражанні. Памятаю, пуцёўка пачыналася ў нядзелю, дык па гэтай прычыне нумар аказаўся непрыбраны пасля папярэднікаў - маўляў, выходны ж...  У сталоўцы пачыналі накрываць на сталы задоўга да пачатку сняданкаў-абедаў, прычым выстаўлялі адразу ўсе стравы ў некалькі паверхаў талерак - да пачатку прыёму ежы яна ўся цалкам астывала... Была позняя восень, але ў санвузле нумара, дзе я жыў, была разбітая шыба, таму ўсё прадзьмувалася ветрам. Прыехаў адтуль з бранхітам. Можна было б прыгадаць і іншыя чароўнасці гэтай "аздараўленчай" установы...

Падобна, што за столькі гадоў там нічога не змянілася!..
Каб пакінуць каментар, калі ласка, актывуйце JavaScript у наладах свайго браўзеру