Падтрымка хрысціянскіх дэмакратаў вырасла на 12% цягам трохі больш чым аднаго месяца.
Такія вынікі маніторынгу грамадскай думкі сацыялагічнай службай INSA.
Калі б выбары адбываліся сёння, за блок канцлеркі Ангелы Меркель прагаласавалі б 38% выбарцаў.
У зялёных — 18% падтрымкі. У сацыял-дэмакратаў — 16%. Лібералы маюць 5,5%.
Падтрымка дзвюх партый на краях палітычнага спектру, правай «Альтэрнатывы для Нямеччыны» і крайне левай Linke (абедзвюм сімпатызуе Масква, бо абедзве выступаюць супраць еўраінтэграцыі), апусцілася да 10 і 7% адпаведна.
Так, немцы высока ацанілі разважлівы падыход да пандэміі каранавіруса, выпрацаваны ўрадам на чале з Ангелай Меркель.
Нямеччына ўвяла абмежавальныя меры адной з першых. Пры гэтым яны былі вельмі рацыянальныя. Як прыклад, немцы адмовіліся ад праверкі білетаў у грамадскім транспарце, каб кандуктары не сталі выпадковымі разносчыкамі інфекцыі. У краіне былі спыненыя спартовыя і забаўляльныя мерапрыемствы, дзяцей перавялі на дыстанцыйнае навучанне. У той жа час урад выдзеліў значныя сродкі на падтрымку той частцы бізнэсу, якая пацярпела ў выніку форс-мажорных абставін. У прыватнасці, урад прыйшоў на дапамогу авіякампаніі «Люфтганза».
