10.04.2020 / 10:06

Ізаляцыя «Энергетыка» і «Белшыны». Цікавосткі чацвёртага тура чэмпіянату Беларусі па футболе 8

Па выніках трэцяга тура ў вышэйшай лізе вызначыліся аднаасобныя лідар і аўтсайдар. На двух палюсах табліцы атабарыліся «Энергетык-БДУ» і «Белшына», хаця прагназавалася, што яны будуць недзе побач. Але калі ў Бабруйска тры абаранкі ў трох матчах, то ў «студэнтаў» неспадзявана — тры перамогі!

Разам з Букмекерскай канторай Леон мы працягваем асвятляць найлепшы футбольны чэмпіянат у свеце.

Прапісацца на вяршыні мінчукам пасля перамогі над «Мінскам» дапамаглі землякі з «Дынама», а таксама «Слуцк», якія выйгралі ў «Тарпеда-БелАЗ» і «Іслачы» адпаведна. Першую вікторыю нарэшце здабыла і БАТЭ, але ў каманды Альшэўскага пакуль не відаць пазітыўных зрухаў.

Мінскае «Дынама» нарэшце адсвяткавала перамогу. Фота: ФК «Дынама-Мінск».

Працягваюцца праблемы і ў іншых топаў: «Шахцёр» у звышпанылым матчы падзяліў балы з «Нёманам», а берасцейскае «Дынама» стала чарговай ахвярай «Славіі». Таму пакуль табліца выглядае вельмі нязвыкла, што робіць наш чэмпіянат яшчэ больш інтрыгуючым.

Вось як скончыліся матчы другога тура:

  • «Белшына» — «Гарадзея» 0:1 (66, Сайчыч)
  • «Дынама-Мінск» — «Тарпеда-БелАЗ» 2:0 (21, Клімовіч; 43, Бручыч)
  • «Шахцёр» — «Нёман» 0:0
  • БАТЭ — «Рух» 1:0 (7, Драгун)
  • «Дынама-Брэст» — «Славія» 1:2 (86, Тыманюк (аг) — 64, Чухлей (п); 77, Катляроў)
  • «Энергетык-БДУ» — «Мінск» 2:0 (21, Наско; 90+2, Яхшыбоеў)
  • «Смалявічы» — «Віцебск» 0:1 (25, Клапоцкі)
  • «Іслач» — «Слуцк» 2:3 (48, 58, Макась — 16, Каанда; 61, Сямёнаў; 75, Гафар (п))

Давайце паглядзім, што нас чакае ў матчах чацвёртага тура.

«Нёман» — «Белшына»

Гарадзенцы ў трох матчах дамагліся трох розных вынікаў, і пакуль складана ацэньваць сапраўдную моц каманды. Але перамога над крэпкім «Віцебскам» і нічыя з «Шахцёрам» усяляюць пазітыў.

Чаго не скажаш пра «Белшыну». Бабруйчане, нават не сустракаючыся з топ-камандамі, не змаглі пазмагацца за турнірныя балы.

Прагноз «НН»: «Нёман» пераможа.

«Слуцк» — «Віцебск»

«Слуцк» нечакана стаў самай хайповай камандай у свеце. Пра кейс з аўстралійцамі не напісалі толькі лянівыя СМІ, а праз краўдфандынг клуб змог сабраць амаль тры тысячы даляраў.

Слава дапамагла падначаленым Віталя Паўлава выйграць у моцнай «Іслачы». У «ваўкоў» было шмат момантаў, але цудоўная гульня Барыса Панкратава і сусветная падтрымка прынеслі «Слуцку» другую перамогу ў трох матчах.

Герой матчу з «Іслаччу» Барыс Панкратаў. Фота: ФК «Слуцк».

«Віцебск» ціхенька таксама набраў 6 балаў і не супраць замацавацца на вяршыні. Але матчы ў Слуцку для паўночнай каманды звычайна складваюцца вельмі няпроста.

Прагноз «НН»: «Слуцк» пераможа.

«Тарпеда-БелАЗ» — «Энергетык-БДУ»

Пра «студэнтаў» ужо нельга сказаць, што яны граюць у шалёны футбол, забіваючы шмат мячоў і прапускаючы яшчэ больш. За тры гульні «Энергетык» прапусціў усяго адзін мяч, а ўлюбёны «тотал, большы за 2.5» зайшоў усяго аднойчы.

У жодзінцаў ёсць шанец вярнуцца на вяршыню табліцы. Для гэтага трэба ў першы раз у сезоне абгуляць «Энергетык». Летась гэта ў «чорна-белых» не атрымалася. 

Прагноз «НН»: «Тарпеда» не прайграе.

«Гарадзея» — «Дынама-Мінск»

З Гарадзеі прыходзяць не самыя прыемныя навіны. Мясцовая футбольная каманда адчувае фінансавыя праблемы, якія ўжо выліліся ў нерэгулярныя выплаты заробкаў футбалістаў. Надзеі кіраўнікоў клуба былі звязаныя з новым босам цукровага завода, але Ігар Макар пакуль не спяшаецца дапамагаць камандзе.

«Дынама» правяло класны матч супраць «Тарпеда-БелАЗ» і не супраць развіць поспех. Але апошні раз у Гарадзеі падначаленыя Гурэнкі бясслаўна прайгралі, таму трэба быць пільнейшымі.

Прагноз «НН»: «Дынама» пераможа.

«Мінск» — БАТЭ

Пакуль няясна, як трэнерскі штаб БАТЭ збіраецца мяняць гульню сваёй каманды. Пасля першай перамогі ў чэмпіянаце адбылася першая паўфінальная гульня са «Славіяй». І зноў мазырчукі перамаглі, а БАТЭ паказала бяззубую гульню.

«Мінск» у канцоўцы матчу з «Энергетыкам» меў шанцы на нічыю, але ў канцоўцы прапусціў другі мяч, што прывяло да першай паразы ў сезоне. Андрэй Разін ведае, як перамагаць БАТЭ, і паспрабуе гэта зрабіць і з абноўленым складам.

Прагноз «НН»: БАТЭ пераможа.

«Смалявічы» — «Шахцёр»

  • 12.04, 17:00. Барысаў, стадыён «Гарадскі».

«Смалявічы» пакуль падаюцца самай бессэнсоўнай камандай чэмпіянату, якая гуляе абы-дзе. Гэта, вядома, не магло не адбіцца на выніках — усяго 1 бал з 9 магчымых.

У «Шахцёра» з вынікамі таксама не ўсё добра, але буксаванне галоўных канкурэнтаў пакідае падначаленым Вернідуба шанцы на агульны поспех. 

Прагноз «НН»: «Шахцёр» пераможа.

«Дынама-Брэст» — «Іслач» 

Нас чакае рымэйк кубкавага чвэрцьфіналу. Хаця матч тады і скончыўся нулявой нічыёй, але арбітр Віталь Севасцьянік паказаў ажно чатыры чырвоныя карткі.

У чэмпіёнаў — усяго 4 балы пасля трох матчаў. Фота: ФК «Дынама-Брэст».

Ёсць адчуванне, што ў матчы чэмпіянату каманды не будуць гуляць у закрыты футбол. Балы патрэбныя абедзвюм камандам.

Прагноз «НН»: Тотал, большы за 2.5.

«Славія» — «Рух» 

Аляксандр Сяднёў будуе з «Руха» маладую сімпатычную каманду. Праз недахоп вопыту берасцейцам зусім крыху не хапіла, каб зачапіць БАТЭ, але праблемы канкурэнтаў мусяць дапамагчы «Руху» замацавацца ў вышэйшай лізе.

Фанаты «Славіі» запрашаюць Месі і Раналду ў Мазыр. Фота: ФК «Славія-Мазыр».

Пасля ўдалай кубкава-чэмпіянатнай серыі гульцы «Славіі» відавочна шкадуюць аб пройгрышы ў Слуцку, дзе вынік зрабілі іх памылкі. 

Прагноз «НН»: «Славія» не прайграе.

У сувязі з распаўсюдам каранавіруса мы не раім вам наведваць людныя мерапрыемствы, у тым ліку футбольныя матчы. Калі ўсё ж вырашыце пайсці на стадыён, прытрымлівайцеся мераў засцярогі.

Дзяліцеся прагнозамі ў каментарах. Калі лічыце сябе экспертам у беларускім футболе, зрабіце стаўку ў Букмекерскай канторы Леон!

Хочаш падзяліцца важнай інфармацыяй ананімна і канфідэнцыйна?

Піліп Каваленка

2
Литао / Адказаць
10.04.2020 / 10:25
Шаноуны Жвiр...Жду ваши прогнозы, мне интересно..
6
Жвір / Адказаць
10.04.2020 / 11:10
«Нёман» — «Белшына» - 2:0
«Слуцк» — «Віцебск» - 0:0
«Тарпеда-БелАЗ» — «Энергетык-БДУ» - 1:1
«Гарадзея» — «Дынама-Мінск» - 0:1
«Мінск» — БАТЭ - 0:0
«Смалявічы» — «Шахцёр» - 1:2
«Дынама-Брэст» — «Іслач» - 0:0
«Славія» — «Рух» - 0:0


3
Литао / Адказаць
10.04.2020 / 11:28
Жвір, ..Как бы все окей. Только думаю БАТЭ может "лечь". Мне кажется пацаны тренера Альшевского сливают. А так если не по счету а по итогу, думаю 6 из 8 попадет.Посмотрим
Паказаць усе каментары/ 8 /
Каб пакінуць каментар, калі ласка, актывуйце JavaScript у наладах свайго браўзеру