У канцы сакавіка каранавірус выявілі ў Капыльскім раёне. Эпіцэнтрам заражэння сталі вёскі Доктаравічы, Новыя Доктаравічы, а таксама Вуглы. Некалькі дзясяткаў жыхароў гэтых паселішчаў шпіталізавалі ў бальніцы Мінска, Барысава і Капыля.

1 красавіка ў Капыльскай цэнтральннай раённай бальніцы памерла 70-гадовая настаўніца англійскай мовы Наталля Арлова, якая колькі дзён перад гэтым знаходзілася на адзіным у раёне апараце ШВЛ.

«Усё нармальна ў нас. Больш за палову хлопцаў ужо папрыходзілі на працу, паварочаліся з бальніц. Больш ніхто не паміраў, усё добра», — сказалі нам у Доктаравічах.

Брат і муж памерлай Наталлі Арловай таксама пайшлі на папраўку.

Паразмаўляў з «Нашай Нівай» і галоўны доктар Капыльскай раённай бальніцы.

31 сакавіка частка супрацоўнікаў бальніца сышла на каранцін. Гэта значыць, што яны жылі на працы, працягваючы выконваць свае функцыі.

«Каранціна ў нас не было, як ва ўсёй краіне, — кажа галоўны ўрач Сяргей Пацяйковіч.

— Некаторыя супрацоўнікі жылі і працавалі так, як ім было зручна, мы ім быт забяспечылі. Па-рознаму, некаторыя жывуць па-ранейшаму ў бальніцы, частка — па дамах. Сітуацыя стабілізавалася. Многія людзі ўжо вяртаюцца па дамах, шмат тых, хто паправіўся».

Чытайце:

«Прыехаў сын-дальнабойшчык, пасля Валю забралі ў бальніцу». Што адбываецца ў Доктаравічах на Капыльшчыне?

«Павязуць у Мінск на крэмацыю». Першая смерць у капыльскай вёсцы, дзе ўспыхнуў каранавірус

Хочаш падзяліцца важнай інфармацыяй ананімна і канфідэнцыйна?