Знакаміты беларускі оперны спявак Віктар Гур'еў памёр 22 красавіка на 94-м годзе жыцця. Пра гэта TUT.BY паведамілі ў Нацыянальным тэатры оперы і балета.

Віктар Гур'еў. Фота: архіў Нацыянальнага тэатра оперы і балета Беларусі

Віктар Гур'еў нарадзіўся 11 жніўня 1926 года на Жытоміршчыне (Украіна). Ратуючыся ад голаду і галечы, сям'я Гур'евых (у будучага спевака было 11 братоў і сясцёр) пераехала на Данбас. Бацька працаваў на шахце. Менавіта там Віктар упершыню выйшаў на сцэну ў складзе сямейнага хору.

Падчас вайны Віктара сагналі ў Нямеччыну, ён працаваў на заводзе ў штамповачным цэху. Пасля вызвалення прайшоў праверку спецслужбаў і быў прызваны ў армію. Служыў на тэрыторыі Германіі ў музычным узводзе. Пасля дэмабілізацыі скончыў Жытомірскае музычнае вучылішча і Беларускую кансерваторыю ў Мінску.

Віктар Гур'еў ў ролі Хазэ. Фота: архіў Нацыянальнага тэатра оперы і балета Беларусі

У 1960-1992 гадах з'яўляўся салістам Тэатра оперы і балета, атрымаў званне «Заслужанага артыста Рэспублікі Беларусь». Выканаў больш за 50 роляў. Сярод іх Каварадосі («Тоска»), Хазэ («Кармэн»), Атэла ў аднайменнай оперы, Герман («Пікавая дама») і іншыя.

Віктар Гур'еў з'яўляецца заснавальнікам беларускай тэатральнай дынастыі. Яго сын Анатоль Гур'еў — вядучы майстар сцэны ў Тэатры-студыі кінаакцёра, дачка Ганна Гур'ева — оперная спявачка, салістка Нацыянальнага тэатра оперы і балета.

Развітанне з Віктарам Гур'евым адбудзецца 24 красавіка з 12-й да 13-й гадзіны ў рытуальнай зале па адрасе Мінск, вуліца Сямашкі, 8/5.

Хочаш падзяліцца важнай інфармацыяй ананімна і канфідэнцыйна?