10 гадзін музыкі: марафон «Дабро live» сабраў 22 тысячы рублёў для медыкаў ФОТА, ВІДЭА
16 красавіка ў Мінску прайшоў 10-гадзінны дабрачынны марафон «Дабро», арганізаваны брэндам Xiaomi ў Беларусі і Новым радыё. Амаль два дзясяткі беларускіх артыстаў выступілі ў жывым эфіры, каб сабраць сродкі для набыцця беларускім медыкам усяго неабходнага для барацьбы з каранавірусам.
Марафон падтрымалі Аня Шаркунова, VAL, Макс Лорэнс, Nuteki, UZARI, Litesound і іншыя музыкі. Яны выходзілі ў жывы эфір са студыі лайф-спот Sound Cafe, а таксама са сваіх кватэр, знаходзячыся ў рэжыме самаізаляцыі. Спецыяльным госцем марафона «Дабро» стаў Макс Барскіх, выказаўшы сваю салідарнасць з беларусамі. Усе 10 гадзін нон-стоп марафон вялі дыджэі «Новага радыё» Саша Козыраў і Дзіма Лаўроў.
Падчас марафону да яго далучыліся больш за 3000 гледачоў з усіх гарадоў Беларусі, шмат з іх перавялі грошы на дабрачынны рахунак. Гэтыя сродкі былі перададзеныя фондам «Дабро» у мінскі «Хакерспейс», валанцёры якога штодня вырабляюць сродкі абароны для медыкаў.
Дзяніс Елізараў, намеснік дырэктара па маркетынгу Xiaomi Беларусь, так пракаментаваў марафон: «Мы дзякуем артыстам, «Новаму радыё» і ўсім тым, хто дапамог, перавёўшы на рахунак сродкі. Зараз вельмі важна абараніць медыкаў, і толькі нашымі агульнымі намаганнямі мы можам гэта зрабіць. Усе мы разумеем, наколькі лекарам цяжка, бо яны рызыкуюць сваім жыццём дзеля нас з вамі. Мы ведаем, што многія брэнды і арганізацыі ўносяць пасільную дапамогу і ўпэўненыя, што іх будзе станавіцца больш. Дабро павінна аб'ядноўвацца - толькі так мы пераадолеем гэты цяжкі перыяд».
У межах марафону брэнд Xiaomi перавёў 20000 беларускіх рублёў на рахунак мінскага «Хакерспейса» для закупкі абсталявання, матэрыялаў і вырабу сродкаў індывідуальнай абароны для беларускіх медыкаў.
Такія музычныя марафоны не толькі прыцягваюць увагу і аб'ядноўваюць людзей, яны натхняюць рабіць дабро кожнага з нас. Так, UZARI паведаміў аб тым, што частка сродкаў ад продажу альбома «Падзяка сэрца» будзе таксама перададзена ў фонд дапамогі абароны медыкаў ад COVID-19.
«Вельмі важна, што ў такі нялёгкі час многія людзі не губляюць сілы духу, становяцца мацней. Шмат хто гатовы прыкладаць максімум намаганняў, каб нашы медыкі вярталіся дадому здаровымі», — падзяліўся эмоцыямі ад 10-гадзіннага дабрачыннага праекта дырэктар «Новага радыё» Уладзімір Богдан.
Трансляцыя і рэквізіты для дабрачынных пералічэнняў даступныя і сёння на сайце https://dobrolive.by/
Івэнт-партнёрам марафону выступіла агенцтва «4 Вымярэнне», PR-партнёр littleMORE.
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню16
Каментары