Delfi.lt
З 27 красавіка ў Літве ўступае ў сілу новы этап змякчэння каранціну — пры выкананні пэўных патрабаванняў адкрыюцца вулічныя кафэ, салоны прыгажосці і музеі, дазволена займацца спортам на вуліцы, адкрыюцца храмы, паведамляе Delfi.
Урад Літвы дазволіў гэтую дзейнасць пры захаванні жорсткіх патрабаванняў бяспекі. У вулічных кафэ за адным столікам могуць сядзець не больш за два чалавекі, столікі павінны стаяць на адлегласці двух метраў. Уладальнікі некаторых кафэ сумняюцца, што ім варта адкрываць установы, паколькі гэта запатрабуе нямала выдаткаў.
Каб палегчыць аднаўленне дзейнасці кафэ, Віленскі муніцыпалітэт даў кавярням магчымасць карыстацца паркамі і скверамі ў цэнтры сталіцы.
Культурныя, забаўляльныя, спартыўныя ўстановы таксама могуць наведваць групы не больш за два чалавекі (выключэнні датычацца членаў адной сям'i), алe ў гэтых установах, як і ў цырульняў, павінна дзейнічаць правіла 10 кв. м на аднаго чалавека.
Салярыі, масажныя кабінеты, салоны тату пакуль не будуць адчыненыя. З панядзелка дазволена праводзіць экзамены на кіраванне, займацца гольфам, тэнісам, стральбой на вуліцы, адкрыюць картадромы, заапаркі, батанічныя сады — але толькі тыя, што знаходзяцца на вуліцы.
Канферэнцыя біскупаў паведаміла, што ад панядзелка ў храмах штодня, за выключэннем нядзелі, будуць праходзіць службы з удзелам людзей, храмы будуць абмяжоўваць колькасць наведвальнікаў. З панядзелка адкрыюцца дзіцячыя сады — яны прымуць дзяцей, чые бацькі павінны выходзіць на працу.
Каранцін у Літве дзейнічае да 11 мая.
Па звестках Сусветнай метрыкі, у Літве за ўвесь час зафіксавана 1449 выпадкаў каранавіруса (у Беларусі 10 463), доля тых, хто захварэў, у суседзяў у два разы меншая.
У чацвер зафіксавана 28 новых выпадкаў, у пятніцу 12, у суботу 16, у нядзелю — 16 (у Беларусі учора 873, перад гэтым 817).
За ўвесь час памёр 41 чалавек
Найбольшая колькасць новых выпадкаў за дзень была 18 красавіка — 90 чалавек.
