Пра гэта начальнік Галоўнага ўпраўлення прафесійнай адукацыі Мінадукацыі Сяргей Каспяровіч распавёў у праграме «Карціна свету» на СТБ, расказваючы пра нюансы атэстацыі па выніках навучальнага года. Агульнавядомы факт — большасць дзяцей у красавіку не пайшла ў школу. Нават паводле звестак Мінадукацыі ў першы дзень 4-й чвэрці на занятках было 30-40% вучняў, а ў суботу 25 красавіка — 30%.
«Ёсць бягучая атэстацыя, то-бок, залікі, экзамены, ёсць выніковая атэстацыя. На сённяшні дзень мы выразна бачым тыя нормы, якія ёсць у кодэксе, і выразна бачым тыя тэхналогіі, якія выкарыстоўваюцца, — сказаў С. Каспяровіч.
— Па-першае, атэстацыя, для таго каб мы казалі пра якасць адукацыі, яна, гэта вызначана і ў кодэксе, павінна праводзіцца з асабістым удзелам навучэнца».
«Што такое асабісты ўдзел? — задаўся пытаннем чыноўнік. — Асабісты ўдзел, можна было б, пагарачыўшыся, заявіць, што гэта ўдзел і ў дыстанцыйным фармаце, калі твар бачны, калі на камеру адлюстроўваецца твар студэнта, калі можна, напрыклад, з дапамогай нейкіх сродкаў біяметрыі вызначыць, што гэта ён. Але з нашага пункту гледжання, гэтага недастаткова.
Асабісты ўдзел — гэта дэманстрацыя асабістых ведаў. На сённяшні дзень мы не бачым ні тэхналагічнай магчымасці, ні, уласна кажучы, гарантый таго, што будзе забяспечана якасць адукацыйнага працэсу, калі мы правядзём яе па-іншаму».
Паводле чыноўніка, атэстацыя плануецца пры беспасярэднім узаемадзеянні выкладчыка або камісіі з навучэнцам.
«Але ў абавязковым парадку гэта сістэмнае рашэнне ўжо прынята, рэалізуецца, мы будзем фактычна адхіляць магчымасць для масавых скапленняў людзей, адхіляць магчымасць для таго, каб былі ў вялікіх колькасцях кантакты. Гэта ўсё магчыма. З пункту гледжання і правядзення экзаменаў — можна выбудоўваць графікі, калі студэнты не ўсе прыходзяць да аднаго часу, а прыходзяць па вызначаным, загадзя складзеным раскладзе, выкарыстанне пераважна вялікіх аўдыторый і гэтак далей», — сказаў С. Каспяровіч.
«Паверце, мы ўжо сёння пачалі папярэднія рашэнні абмяркоўваць з установамі адукацыі. І бачым тут вельмі такое сістэмнае разуменне. Бо казаць пра аддаленую атэстацыю, напэўна, можна будзе ў нейкай будучыні», — дадаў ён.
«Дзеці не пайшлі ў школу, не ходзяць. Як атэстоўваць будзем?» — задаў пытанне вядучы праграмы Ігар Марзалюк.
«Іншых рашэнняў, напэўна, на сённяшні дзень быць не можа. Калі дзеці не ходзяць на заняткі, гэтым самым прадухіляючы і для сябе, і для сваіх блізкіх магчымасць кантактаваць, напрыклад, з людзьмі, якія, дапусцім, маюць захворванні, нават у схаванай форме,
але на атэстацыю, усё-такі, яны павінны прыйсці. А наша задача, з улікам рэкамендацый міністэрства аховы здароўя — забяспечыць максімальна бяспечныя ўмовы, забяспечыць умовы, калі няма гэтых масавых навал. І тут, зноў жа, рашэнні бачныя».
Настаўнікі звяртаюцца да міністра Карпенкі: Пазбавіць атэстацыі дзяцей, якія навучаюцца дома — непедагагічна і не па-людску
