Пацыенты, якія перахварэлі на COVID-19 і ўжо выпісаныя з бальніцы, могуць па-ранейшаму несці глыбока ў лёгкіх часцінкі каранавіруса. Такая рэшткавая інфекцыя не можа быць выяўленая падчас звычайных тэстаў, сцвярджае група кітайскіх навукоўцаў.
Іх даследаванне, пра вынікі якога паведамляе ў чацвер газета South China Morning Post, можа праліць святло на тое, чаму некаторыя ачунялыя пацыенты пасля зноў прызнаюцца інфікаванымі, піша tass.ru.
«Наша праца — гэта першае сведчанне ў галіне паталогіі аб рэшткавым вірусе ў лёгкіх пацыента, у якога тэсты тры разы запар аказваліся адмоўнымі», — гаворыцца ў матэрыяле медыкаў, узначаленых доктарам Бянь Сіу з армейскага медыцынскага ўніверсітэта горада Чунцын.
Яны даследавалі выпадак 78-гадовай пацыенткі, якая была шпіталізаваная з COVID-19 і прайшла курс лячэння, па выніках якога тэсты (на аснове аналізу мазкоў з насавой і ротавай поласці) былі тры разы запар адмоўныя. Абследаванне метадам камп'ютарнай тамаграфіі таксама паказала значнае паляпшэнне стану пацыенткі, аднак на наступны дзень яна нечакана памерла ад сардэчнага прыступу.
Ускрыццё і праведзенае даследаванне пад электронным мікраскопам выявілі сляды часціц каранавіруса ў глыбокіх тканках лёгкіх. Пры гэтым прыкметы віруса адсутнічалі ў тканках печані, сэрца, кішэчніка і ў касцяным мозгу. Кітайскія медыкі, якія апублікавалі вынікі сваёй працы ў навуковым часопісе Cell Research, канстатавалі, што схаваныя штамы ў лёгкіх у той жа час не выклікалі ніякіх відавочных сімптомаў.
