03.05.2020 / 23:59

Паглядзіце першы беларускі бардаўскі КЛІП, алічбаваны з запісу 1995 года. «Дай Бог, каб маё каменне аднойчы іх апякло» 10

4 мая 2005 года памёр беларускі «пракляты паэт» Анатоль Сыс. Спаўняецца 15-я гадавіна ягонай смерці.

Да гэтай нагоды быў алічбаваны першы беларускі бардаўскі відэакліп 1995 года, на якім бард Андрэй Мельнікаў спявае песню на верш Анатоля Сыса «Маналог Алеся Гаруна» («Гараць камяні ў маім вогнішчы»).

У сярэдзіне 90-х гэты кліп трансляваўся па беларускім тэлебачанні. З таго часу тэлебачанне стала не надта беларускім, і кліп нідзе больш не паказвалі. 

Ацаніце стылістыку таго часу:

Анатоль Сыс пражыў 45 бурных гадоў. Гэты паэт, народжаны ў наддняпроўскай вёсцы Гарошкаў Рэчыцкага раёна, быў знакавай фігурай свайго часу і актыўным удзельнікам змагання за незалежнасць Беларусі.

Вось тэкст песні:

Гараць камяні ў маім вогнішчы,
расцвеленыя агнём,
нібы ваўчаняты ў логвішчы
сонечным прамянём.

У твар мне шугае полымя,
ды я ўсё адно бяру
каменне рукамі голымі
і гэткім, як сам, дару.

Бяруць і да сэрцаў туляць:
няхай нас ратуе боль
і вучыць пра бліжніх думаць,
пра тых, хто гібее ў золь,

пра тых, хто прамёрз да костак,
хто шлях да агню згубіў,
хто д'яблу чырвоным хростам
Айчыну сваю пазбыў.

Дай Бог, каб маё каменне
аднойчы іх апякло,
прымусіла ўстаць з каленяў,
пайсці на маё святло.

Я — тут! Я шугаю полымем!
Праз боль я з сябе бяру
каменне рукамі голымі
і гэткім, як сам, дару.

Дай Бог, каб маё каменне
Жар-птахам дайсці змагло
да тысячных пакаленняў
і сэрцы іх апякло!

Хочаш падзяліцца важнай інфармацыяй ананімна і канфідэнцыйна?

Сяргей Гезгала

2
Васіль / Адказаць
04.05.2020 / 00:11
Сіла ў паэзіі Сыса ёсць.
17
Туш / Адказаць
04.05.2020 / 01:13
Верш добры, выкананне так сабе. Увогуле з выканаўцамі і пачуццём густу ў нас бяда. Далёка хадзіць ня трэба, некалькі месяцаў таму НН падсунула гімн Пагоня збацаны на сентызатары, як прыклад для захаплення.
1
Козік / Адказаць
04.05.2020 / 09:38
Сабака - таксама моцная песня Андрэя Мельнікава на словы Анатоля Сыса...
Паказаць усе каментары/ 10 /
Каб пакінуць каментар, калі ласка, актывуйце JavaScript у наладах свайго браўзеру