Дырэктар Нацыянальнага цэнтру заканадаўства і прававых дасьледаваньняў Вадзім Іпатаў у інтэрвію Нацыянальнаму прававому інтэрнэт-парталу расказаў пра новаўвядзеньні ў Кодэкс аб адміністрацыйных правапарушэньнях (КаАП), які рыхтуецца цяпер, піша Радыё Свабода.

Пашыраць прафіляктычныя меры

Адно з найбольш істотных новаўвядзеньняў — прафіляктычныя меры ўзьдзеяньня, якія вынесьлі ў Кодэксе ў асобны разьдзел. Сярод іх — вусная заўвага, папярэджаньне, налічэньне штрафных балаў пры парушэньні правілаў дарожнага руху, выхаваўчыя меры ў адносінах да непаўналетніх.

Ключавая асаблівасьць гэтых мераў — адсутнасьць прававых наступстваў прыцягненьня да адказнасьці: яны ня будуць лічыцца адміністрацыйным спагнаньнем, а новае аналягічнае правапарушэньне ня будзе лічыцца паўторным.

Папярэджаньне прапануюць перавесьці ў разрад прафіляктычных мер і істотна пашырыць магчымасьць прымяненьня гэтай меры.

Парушэньні падзеляць на тры катэгорыі

Новы праект КаАП прадугледжвае падзел адміністрацыйных правапарушэньняў на 3 катэгорыі, у залежнасьці ад ступені грамадзкай шкоднасьці і цяжкасьці наступстваў:

  • адміністрацыйныя праступкі (фізычных асобаў за іх будуць караць штрафам ня больш за 10 базавых велічынь),
  • значныя адміністрацыйныя правапарушэньні (можа быць больш высокі штраф, а таксама канфіскацыя, дэпартацыя),
  • грубыя адміністрацыйныя правапарушэньні (за якія можа пагражаць адміністрацыйны арышт, пазбаўленьне спэцыяльнага права або права займацца пэўнай дзейнасьцю; паўторнае ўчыненьне якіх цягне за сабой крымінальную адказнасьць).

Увядуць грамадзкія работы

Пры падрыхтоўцы новага кодэксу перагледзелі таксама сыстэму і дыфэрэнцыяцыю адміністрацыйных спагнаньняў. Зь іх ліку прапануюць выключыць папярэджаньне і папраўчыя работы, але ўвесьці новае спагнаньне — грамадзкія работы.

Перагледзяць памеры штрафаў

Максымальны штраф за зьдзяйсьненьне адміністрацыйнага правапарушэньня прапануюць зьнізіць да 30 базавых велічынь (на сёньня гэта 810 рублёў). Разглядаецца варыянт, пры якім будзе дапускацца накладаньне штрафу меншага, чым ніжняя мяжа санкцыі. Каб стымуляваць людзей добраахвотна плаціць штрафы, у праект уключылі норму аб зьмяншэньні памеру штрафу пры яго выплаце ў скарочаны тэрмін.

Мякчэйшыя меры для непаўналетніх

У праект уключаны новы разьдзел, прысьвечаны адміністрацыйнай адказнасьці непаўналетніх. Рэжым адміністрацыйнай адказнасьці для іх «больш гуманны ў параўнаньні з дарослымі», пашыраны спэктар прафіляктычных мер узьдзеяньня замест адміністрацыйнага спагнаньня.

Агулам рэформу ў КаАП абяцаюць маштабнай — з кодэксу прыбяруць каля 50 артыкулаў; вылучаць у асобную групу парушэньні, зарэгістраваныя дарожнымі камэрамі фотафіксацыі; правапарушэньне не заўсёды будзе заканчвацца пратаколам і штрафам, часам — толькі папярэджаньнем.

Як паведаміў Вадзім Іпатаў, 22 красавіка праект новага Кодэксу аб адміністрацыйных правапарушэньнях перадалі зацікаўленым дзяржаўным органам і іншым арганізацыям для ўзгадненьня, пасьля ён будзе дапрацаваны з улікам усіх заўваг і прапановаў.