19.05.2020 / 11:10

Ярмошына адмовіла ў рэгістрацыі ўсім «кандыдатам пратэсту» Статкевіча абноўлена 47

Лідзія Ярмошына, фота Уладзя Грыдзіна, «Радыё Свабода»

Сёння ЦВК разглядае пытанні рэгістрацыю ініцыятыўных груп кандыдатаў у прэзідэнты. Усяго падалі дакументы 55 чалавек, у пятніцу зарэгістравалі 4 групы (Лукашэнка, Гайдукевіч, Няпомняшчых, Ганцэвіч), 10 адкінулі (пераважна групы Статкевіча). Сёння плануюць разгледзець 23 заяўкі.

Відэа ТУТ.

Першай разгледзелі дакументы бізнэсвумен Наталлі Кісель. Сказалі, што група збольшага адпавядае крытэрам, 13 чалавек прадаставілі недакладныя звесткі, але іх проста выкрасляць. Таму ў групе застаецца 147 чалавек.

Наступная — Алена Ашыхміна. Яна таксама бізнэсвумен, неяк засвяцілася ў відэа Сяргея Ціханоўскага. Камісія кажа, што ёсць парушэнні.

«Асабіста я абтэлефанавала 100 чалавек, я за кожнага ручаюся, усе звесткі пераправяраю асабіста, усе чакалі званкоў ад ЦВК, усе былі ў курсе», — запэўнівае Ашыхміна.

Кажа, што калі ёй не дазволяць збіраць подпісы, то яна будзе прасіць адразу зрабіць яе кандыдатам у прэзідэнты без збору подпісаў. Ашыхмінай у выніку адмовілі.

Жанна Раманоўская. Хадзіла на выбары ў 2015 годзе, але бессэнсоўна, як і цяпер. Здаецца, яна прынесла тыя ж подпісы, што і мінулы раз. Але некаторыя з тых людзей ужо памерлі. У групе засталося менш за 100 чалавек, таму на выхад.

«Мілая жанчына. Мы яе пазбавілі галоўнага — яна хацела [трапіць на] тэлебачанне», — Ярмошына з калегамі абмяркоўвае Раманоўскую пасля таго, як тая сышла.

Пачынаецца разгляд «кандыдатаў пратэсту» Міколы Статкевіча — машыніст жодзінскага водаканала Дзмітрый Кудравец, фермер Пятро Карабанаў і гродзенскі пенсіянер Мікалай Салянік.

Ярмошына і яе каманда не хоча рэгістраваць «кандыдатаў пратэсту». Гэтыя прэтэндэнты не выключэнне.

Кудраўцу адмаўляюць, бо людзі ў яго спісе пацвердзілі, што ведаюць Статкевіча. А Кудраўца, маўляў, не.

З Карабанавым такая ж гісторыя. Ён пытаецца ў Ярмошынай, які працэнт забракаваных подпісаў. Яна адмаўляецца называць.

«Гэта наша права, званіць 2-3 чалавекам ці 20-30, — кажа Ярмошына. — Аўдыязапісаў няма, бо гэта не працэсуальныя дзеянні».

Адмовілі і Саляніку.

Наступная група «кандыдатаў пратэсту». І да іх тыя самыя прэтэнзіі. Ініцыятыўная група ведае Статкевіча, а яго кандыдатаў — не. Таму ўсім ім адмаўляюць. У прыватнасці, Тамары Патоцкай з аграсядзібы «Чыжы» з-пад Баранавічаў, мазырчуку Уладзіміру Неўмяржыцкаму.

Марына Адамовіч прыносіла «жалезны спіс». Яе муж Мікола Статкевіч сцвярджаў, што гэта гарантаваныя подпісы. Але Ярмошына заяўляе, што яны няякасныя — маўляў, у іх не былі пазначаныя пашпартныя даныя.

Ярмошына: Я баюся, жонку Статкевіча чакае сямейная сцэна!

Астатнім адмаўляюць завочна: Рэгіна Беркус, Аляксандр Якушкоў, Алена Давыдава, Аляксей Зуевіч, Аляксандр Школьнікаў, Юрый Чудзіновіч, Уладзімір Кійко, Сяргей Статкевіч, Юрый Новікаў, Віктар Шорац, Юрый Касач, Наталля Стрэльчанка, Аляксандр Абрамовіч.

Адмовілі і самому Міколу Статкевічу праз судзімасць.

NN.by

Хочаш падзяліцца важнай інфармацыяй ананімна і канфідэнцыйна?

0
Генэрал Голад / Адказаць
19.05.2020 / 11:43
Цытата сябра камісіі: "... вы  кажаце, што прачыталі выбарчы кодэкс, але акрамя выбарчага кодэкса мы маем яшчэ і правапрымяняльную практыку і заканадаўчыя акты...".
А я думаў, што тыя акты, якія супярэчаць кодэксу - лічацца нікчымнымі. А што такое правапрымяняльная практыка, якая не адпавядае кодэксу і супярэчыць ягоным тэзісам? 
2
Владимир123 / Адказаць
19.05.2020 / 11:48
Картинка к статье очень хорошо отражает суть белорусских так называемых "выборов"
0
Трактарыст-максімаліст / Адказаць
19.05.2020 / 11:55
Кудраўцу адмаўляюць, бо людзі ў яго спісе пацвердзілі, што ведаюць Статкевіча. А Кудраўца, маўляў, не.
Якім чынам пацвердзілі? Асабіста прыйшлі і пацвердзілі? Ці па тэлефоне? А дзе гарантыя, што работнікі ЦВК не хлусяць? Дзе гарантыя, што па тэлефоне адказаў той самы чалавек, а не брат/сват/ кум/сусед/знаёмы/калега па працы? Гэтыя абзвоны з боку ЦВК не маюць ніякай юрыдычнай моцы. Самадзейнасць з боку ЦВК ўзвезденая ў ранг закона. А дакладней беззаконня.


Паказаць усе каментары/ 47 /
Каб пакінуць каментар, калі ласка, актывуйце JavaScript у наладах свайго браўзеру