Статкевіч і Ціханоўскі сабралі тысячы мінчукоў на выбарчы пікет ФОТЫ, ВІДЭА
24 мая блогер і палітык праводзяць супольную акцыю ў межах выбарчай кампаніі на Камароўцы ў Мінску.
Ініцыятыўныя групы Сяргея Ціханоўскага і Міколы Статкевіча не былі зарэгістраваныя ЦВК, але зарэгістравалі жонку Ціханоўскага, а таксама аднаго з паплечнікаў Статкевіча Уладзімера Няпомняшчых.
Каля Камароўкі сабраліся сотні людзей. Большасць з іх у масках.
Самой Святланы Ціханоўскай на пікеце няма.
Таксама на акцыі прысутнічае Вольга Кавалькова, якая ўдзельнічала ў апазіцыйным праймерыз. На плошчы перад рынкам два цэнтры прыцягнення — Няпомняшчых і Ціханоўскі.
Ля сталоў для збору подпісаў утварыліся велізарныя чэргі. Чарга да падпісных лістоў расцягнулася ад уваходу на рынак да Дома мэблі. У чарзе больш за 400 чалавек.
Статкевіч, як давераная асоба Уладзіміра Няпомняшчых і Вольгі Кавальковай, заявіў, што гатовы абмеркаваць, што рабіць беларускаму народу.
Уладзімір Няпомняшчых заявіў, што сёння ў Беларусі выбараў няма, а таксама назваў сябе пратэстным кандыдатам і заклікаў не хадзіць на выбары.
Некаторыя ўдзельнікі прыходзяць на пікет з хатнімі тапкамі, як і прасіў Ціханоўскі. Гэта сугучна з адным з антылукашэнкаўскіх лозунгаў.
Блогер Ціханоўскі прайшоўся уздоўж вялікай чаргі, пагутарыў з некаторымі прыхільнікамі, а таксама пачаў свой стрым. Людзі сустрэлі Ціханоўскага авацыямі.
Блогер расказаў, што ў найбліжэйшыя 20 дзён будзе ездзіць па буйных гарадах краіны і ладзіць пікеты.
Ціханоўскі заявіў журналістам, што ён выступае за незалежную Беларусь і супраць паглыблення інтэграцыі з Расіяй. У той жа час, лічыць блогер, з кім і як сябраваць павінны вырашаць самі беларусы, а не адзін чалавек. Ціханоўскі лічыць, што самы прарасейскі кандыдат у Беларусі — сам Лукашэнка. Таксама Ціханоўскі адзначыў, што не з'яўляецца прыхільнікам Савецкага Саюза.
У выступленні на пікеце Ціханоўскі заявіў, што калі ў выбарах будзе ўдзельнічаць Лукашэнка, а кіраўніком ЦВК будзе Ярмошына, то на выбары ісці не варта.
Людзі падыходзяць да Ціханоўскага і прапануюць яму і іншым актывістам любую дапамогу.
Цяпер чытаюць
Колькі афіцыйна зарабляюць сыны Аляксандра Лукашэнкі?13
Каментары