Па справе Мікалая Аўтуховіча, Юрыя Лявонава і Уладзіміра Асіпенкі затрыманы слесар кампаніі «Стыф‑Транс» Віктар Макуць.
Як паведаміў БелаПАН праваабаронца Алег Волчак, раніцай 6 красавіка ўпаўнаважаным аддзела па барацьбе з арганізаванай злачыннасцю МУС Яраславам Кавецкім і чатырма супрацоўнікамі спецпадраздзялення «Алмаз»
у доме, падвале дома, а таксама хляве, што належыць В.Макуцю, быў праведзены вобыск. У хляве знойдзена некалькі паляўнічых патронаў, паведаміў А.Волчак. Сам В.Макуць затрыманы.
«Фірма «Стыф‑Транс» займаецца грузаперавозкамі і арандавала памяшканне там жа, дзе працаваў Мікалай Аўтуховіч, — сказаў А.Волчак. — Макуця ўжо дапытвалі па гэтай справе 8 лютага — у дзень, калі былі затрыманы Аўтуховіч, Лявонаў і Асіпенка. Цяпер супрацоўнікі праваахоўных органаў заявілі, што тады Макуць штосьці ўтаіў ад следства. Яго затрымалі на тры дні і адправілі ў Мінск. Паводле нашай інфармацыі, ён знаходзіцца ў Цэнтры ізаляцыі правапарушальнікаў на вуліцы Акрэсціна».
Праваабаронца падкрэсліў, што В.Макуцю 55 гадоў, у яго маці‑інвалід і ў самога высокі нырачны ціск.«Яму не далі магчымасці ўзяць з сабой лекі, а без лекаў ён не можа», — заявіў А.Волчак.
Ваўкавыскія прадпрымальнікі Ю.Лявонаў, М.Аўтуховіч і У.Асіпенка былі затрыманы 8 лютага.Санкцыю на затрыманне і вобыск у іх кватэрах даў пракурор Гродзенскай вобласці. 18 лютага ўсім тром было прад’яўлена абвінавачанне па арт. 218 КК (наўмыснае знішчэнне альбо пашкоджанне маёмасці). Праваабаронцы лічаць затрыманых палітычнымі зняволенымі і звяртаюць увагу на тое, што М.Аўтуховіч і Ю.Лявонаў раней ужо былі судзімыя і прызнаныя «Міжнароднай амністыяй» вязнямі сумлення.
0
0
0
0
0
0
