Сяргей Румас займае пасаду прэм'ера з 18 жніўня 2018 года
Пра гэта ён заявіў сёння на нарадзе з Качанавай, Сергеенкам, Шэйманам і Ордам.
«Мы заўсёды перад рэгістрацыяй кандыдатам дзеючага прэзідэнта абвяшчалі новы склад урада, да выбараў. Гэта было прынцыповае пытанне. Каб людзі бачылі, з кім мы будзем працаваць. А не тое, што выбары прайшлі, за цябе прагаласавалі, а ты там сваякоў, родных, любімых панапіхаў у гэты ўрад, а гэта галоўны выканаўчы орган… Таму нам трэба падрыхтаваць новы склад урада. Рашыць па форме, як будзе фармавацца новы ўрад да выбараў», — цытуе Лукашэнку БЕЛТА.
Кіраўнік дзяржавы адзначыў, што да адпаведных кадравых пытанняў падступаліся яшчэ некаторы час таму, калі Адміністрацыю прэзідэнта ўзначальвала Наталля Качанава.
— Пра гэта казалі, і вельмі многіх міністраў мы прызначылі паўгода таму, і ўбачылі іх у справе. І сёння можам зрабіць выснову, ці могуць яны працаваць у новым ўрадзе або не могуць. Таму настаў час, каб яшчэ раз зірнуць на ўрад, вышэйшых службовых асоб, якія ў нас ёсць, і па іх таксама прымаць рашэнні. Ці мы з імі працуем, або перамяшчаем на новую працу, — адзначыў Лукашэнка.
— Але павінен сказаць, што па вялікім рахунку я не маю прэтэнзій ні да аднаго з гэтых людзей. Але, зразумела, жыццё ідзе, і перамены гэтыя павінны быць. Таму гэтае пытанне, Ігар Пятровіч (кіраўнік Адміністрацыі прэзідэнта Ігар Сергеенка), ваша. Вазьміце ўсю інфармацыю ў Наталлі Іванаўны (Качанавай). Паўгода таму мы дайшлі да кожнага чалавека і прапрацавалі гэтыя пытанні. Дзесьці адбылася замена, а дзесьці мы адклалі вось на гэты перыяд, — даручыў Лукашэнка.
— Ніхто з чальцоў урада не павінен ні крыўдзіцца, ні напружвацца. Я ўпэўнены, што пераважная большасць цяпер дзеючых членаў урада застануцца на сваіх пасадах. Цяпер трэба проста экзамен здаваць. Калі ўсе здадуць — калі ласка. Таму трэба варушыцца, але не мітусіцца, — падкрэсліў ён.
