Сёння кіраўнік краіны заслухоўвае даклад аб сітуацыі на спажывецкім рынку краіны, піша БелТА.
«Нягледзячы на тое, што ў нас у прынцыпе з гандлем у крамах і гэтак далей накшталт усё цярпіма, тым не менш, хацелася б ад вас пачуць ацэнку сітуацыі, якая складваецца на спажывецкім рынку. І пачуць прагноз развіцця спажывецкага рынку і напрамкі гэтага развіцця, асабліва ў плане цэнаўтварэння. Асаблівую ўвагу прашу звярнуць на тавары першай неабходнасці, сацыяльна значныя тавары, без якіх людзі абысціся не могуць, асабліва ва ўмовах эпідэміі», — заявіў кіраўнік дзяржавы.
«Думаю, сёння сітуацыя такая, што мы не проста павінны сузіраць, але і пры неабходнасці ўмешвацца ў тыя працэсы, якія адбываюцца на ўнутраным спажывецкім рынку», — лічыць Аляксандр Лукашэнка.
Міністр антыманапольнага рэгулявання і гандлю Уладзімір Калтовіч паведаміў аб рабоце па забеспячэнні спажывецкага рынку і кантролі над цэнамі. «Самае галоўнае, што сёння, нягледзячы ні на што (перш за ўсё, нягледзячы на знешнія выклікі), сітуацыя па таварным забеспячэнні і цэнах на ўнутраным спажывецкім рынку кіраваная, прагназуемая і стабільная», — сказаў ён.
«Гэта значыць, дэфіцыту ў нас няма ніякага, ні па адной групе тавараў?» — пацікавіўся Аляксандр Лукашэнка.
«У нас няма дэфіцыту і няма ажыятажу», — запэўніў Уладзімір Калтовіч.
На мерапрыемства таксама былі запрошаныя старшыня Камітэта дзяржкантролю Леанід Анфімаў, першы віцэ-прэм'ер Дзмітрый Круты, кіраўнік Мінсельгасхарча Іван Крупко і намеснік кіраўніка Адміністрацыі Прэзідэнта Валерый Бельскі.
