З панядзелка ў Літве пачынаецца новы этап змякчэння ўмоў каранціну: дазваляюцца масавыя мерапрыемствы, адкрываюцца межы для большай колькасці замежнікаў, у некаторыя школы вернуцца вучні 5-11 класаў, піша Delfi.lt.
З 1 па 15 чэрвеня ў мерапрыемствах на адкрытай прасторы могуць удзельнічаць не больш за 300, а ў закрытай — 100 чалавек. Пазней колькасць гледачоў павялічыцца. На ўсіх мерапрыемствах наведвальнікі павінны быць у масках, выконваць адлегласць не менш за 1 метра на адкрытай прасторы і два метры ў закрытым.
З панядзелка ў школу вяртаюцца вучні 5-11 класаў. Ці адкрыюцца школы, вырашаць муніцыпалітэты.
Акрамя таго, з 1 чэрвеня кафэ і рэстараны будуць працаваць на 1 гадзіну даўжэй — да 23:00.
З 1 чэрвеня межы Літвы адкрыюцца для грамадзянаў тых краінаў, дзе захворванне на каранавірус у апошнія два тыдні не перавышала 25 выпадкаў на 100 000 жыхароў. Ім не давядзецца выконваць 14-дзённую ізаляцыю.
У Беларусі пакуль 136,5 выпадка на 100 тысяч насельніцтва, або 921 выпадак у дзень за апошнія два тыдні.
Спіс такіх краін кожны панядзелак будзе аб'яўляць міністр аховы здароўя Аўрэліюс Вярыга.
Акрамя таго, з 1 чэрвеня касуецца пагранічны кантроль на літоўска-латышскай мяжы. Гэта значыць, што мяжу можна перасякаць ў любым месцы, ніякага кантролю не будзе.
