Былы аператыўнік крымінальнага вышуку: Калі б міліцыянера ўдарылі, ён бы ці адразу ўскочыў, ці прыняў абарончую позу
Вынікам правакацыі на пікеце ў Гродне стала затрыманне блогера Сяргея Ціханоўскага і шэрагу яго паплечнікаў. Цяпер яны пераведзены ў Мінск, заведзена крымінальная справа.
Грамадства ўспрымае сітуацыю як спробу сфабрыкаваць рэальны тэрмін для папулярнага палітычнага блогера, які кінуў выклік Лукашэнку.
Чытайце. Праваабаронцы: Ціханоўскі — палітычны зняволены
Журналіст «Нашай Нівы» Арцём Гарбацэвіч у сваім тэлеграм-канале запытаў сілавікоў, што яны думаюць пра затрыманне Ціханоўскага.
Сілавікі, якія працягваюць служыць, пакуль не выказваюцца публічна. Пад сваім імем гавораць людзі, якія выйшлі ў адстаўку.
Сваю ацэнку падзеі даў былы аператыўнік крымінальнага вышуку Вячаслаў Радомскі.
У сістэме МУС ён працаваў з 1999 па 2008 год, частку гэтага перыяду — у крымінальным вышуку Баранавічаў.
Радомскі кажа, што пакуль яшчэ не можа выдаваць усе дэталі сваёй біяграфіі ў органах.
«Відавочна, што сітуацыя з затрыманнем была падрыхтаванай акцыяй: правакатары доўга хадзілі за Ціханоўскім і спрабавалі арганізаваць канфлікт, крычалі і хапалі яго за вопратку.
Што ён рабіў? Сыходзіў і падкрэсліваў, што гаварыць з імі не хоча, на што жанчыны-правакатаркі паскардзіліся супрацоўнікам міліцыі.
«Чалавек не адказвае на мае пытанні!», — і міліцыянеры бягуць па Сяргея, хапаюць яго за рукі.
Гэта цалкам фантастычная рэакцыя міліцыянера на адмову чалавека адказваць на пытанні — паспрабуйце звярнуцца з такім да іншага супрацоўніка, якога вы сустрэнеце на вуліцы.
Далей, калі нават уявіць, што нечыя правы парушаныя і ёсць вінаваты: як участковы так хутка зразумеў, што Ціханоўскі — гэта менавіта той, на каго скардзіцца грамадзянка, што мэтава кінуўся да яго, мінаючы натоўп?
Калі пачалася валтузня, відаць, што Ціханоўскі не чапаў міліцыянераў, а проста сыходзіў у бок, пазбягаючы сутыкнення.
Гэтак жа добра на відэа бачна, як два чалавекі (у зялёнай куртцы і чорнай) акуратна укладваюць міліцыянера на зямлю.
Што робіць міліцыянер? Проста ляжыць і нават не спрабуе падняцца!
Псіхалагічны бок: калі б яго перад гэтым ударылі, то ён, лежачы на зямлі, паспрабаваў бы ці адразу ўскочыць, ці прыняць абарончую позу, прыкрыць жыццёва важныя органы.
Гэтаму ўсяму вучаць супрацоўнікаў.
А фізіялагічна мне таксама цалкам зразумела, што пасля моцнага прапушчанага ўдару ў жывот — нам жа расказваюць пра брушную сценку! — у чалавека ёсць дзве позы: ён не можа разагнуцца і або стаіць на каленях, або скручаны на баку.
А тут гэты ўчастковы спакойна ляжыць, пазіруе на камеру. Напэўна, таму што ён ведаў і ведае, што ніхто яго не біў і біць не будзе, яму не баліць.
А далей імгненна з'яўляецца АМАП, імгненна з'яўляецца хуткая дапамога, а затрыманых развозяць па розных аддзяленнях — гэта на 100% спланаваная правакацыя, на якую Сяргей Ціханоўскі не павёўся, таму давялося ляпіць нейкую недарэчнасць з таго, што ёсць.
Каб рэзюмаваць бездаказальнасць абвінавачвання, не трэба нават быць аператыўным супрацоўнікам, тут усё ясна і так.
Таму я хацеў бы нагадаць людзям, якія такім займаюцца: хлопцы, памятайце, Лукашэнка сыйдзе, а вы застаняцеся».
Каментары