У Лунінцы ад каранавіруса памёр выкладчык па класе баяна, заснавальнік і кіраўнік дзіцячага ансамбля «Кросны», унікальны наладчык інструментаў Сяргей Рыхтэр. Яму было 59 год. З 25 гадоў выкладчык музыкі хварэў на цукровы дыябет. Піша «Медыя-Палессе».
У сям'і Сяргея Рыхтэра выхоўваліся тры дачкі. Усе скончылі музычную школу, любяць музіцыраваць, а старэйшая Ірына выкладае музыку ў Чучавіцкай школе.
Пра тое, якім чынам у яго апынуўся гэты вірус, жонка Валянціна Міхайлаўна і выказаць здагадку не можа. Бо засцерагаўся мужчына ўсімі магчымымі спосабамі. Увесь красавік наогул знаходзіўся дома.
— У адзін момант, тады мы ехалі да маёй мамы на Залессе, адчуў сябе блага… Паклалі ў бальніцу… Тэст на каранавірус пацвердзіўся. Лячылі ўсімі магчымымі і, я б нават сказала, немагчымымі спосабамі. Але… Імунная сістэма з-за хвароб аказалася занадта слабой. Бо ён трымаўся шмат гадоў на таблетках.
У медыцынскай даведцы пра прычыну смерці так і значыцца: «Каранавірусная інфекцыя. Covid-19».
Спецыяльнасць выкладчыка па класе баяна Сяргей Уладзіміравіч атрымаў у Брэсцкім музычным вучылішчы, кіраваў самадзейным аркестрам народных інструментаў. Працаваў баяністам РДК, акампаніятарам клуба чыгуначнікаў, выкладчыкам па класе баяна Палескай ДМШ, затым — у Лунінецкай дзіцячай школе мастацтваў.