«Гэта нейкая магія: мы працавалі ўсю ноч не пакладаючы рук і змаглі праверыць і спакаваць усе падпісныя лісты, якія атрымалі! Гэта рэкорд і гэта 434 985 вашых подпісаў. Цяпер абсалютна ўсе правераны, адабраныя і гатовыя для падачы ў выбарчыя камісіі! Сёння мы адпраўляем апошнія партыі», — паведамляе афіцыйны канал патэнцыйнага кандыдата.
Гэта рэкордная для альтэрнатыўнага кандыдата колькасць подпісаў. Раней максімум — 217 тысяч — сабраў у 1994-м, яшчэ на свабодных выбарах, Зянон Пазняк. У Аляксандра Мілінкевіча ў 2006-м было 198 тысяч. У Сямёна Домаша ў 2001-м — 164 тысячы.
Як паказаў шэраг апытанняў, менавіта банкір і мецэнат Віктар Бабарыка мог бы стаць фаварытам сумленных выбараў.
Бабарыка спрабуе выбудаваць шырокую антылукашэнкаўскую кааліцыю з удзелам самых розных сілаў. Яго кандыдатуру падтрымала таксама нобелеўская лаўрэатка Святлана Алексіевіч.
У апошні тыдзень Аляксандр Лукашэнка абрынуўся на Бабарыку з пагрозамі і абвінавачваннямі, не называючы яго, але ясна ўказваючы, пра каго гаворка. Гэта адбылося пасля таго, як стала ясна, што менавіта Бабарыка набірае рэкордную колькасць подпісаў выбарцаў.
Адначасова з нападкамі Аляксандра Лукашэнкі ад 11 чэрвеня ў кампаніях, звязаных з сябрамі Бабарыкі, прайшлі ператрусы і затрыманні.
«Рубікон пяройдзены», — сказаў у сувязі з гэтым Віктар Бабарыка.
Учора Віктар Бабарыка і ягоны сын Эдуард былі затрыманыя, і цяпер яны знаходзяцца ў СІЗА КДБ. Бабарыку абвінавацілі ў спробе перашкодзіць следству і ціску на сведкаў.
