Ад каранавіруса памёр 39-гадовы выкладчык Вайсковай акадэміі. У сям'і засталося трое дзяцей
Падпалкоўніку з Мінска Аляксею Смародзіну было 39 год. Ён выкладаў на кафедры тылавога забеспячэння Вайсковай акадэміі. Мужчына памёр ад каранавіруса ў панядзелак, 22 чэрвеня, пасля двух месяцаў знаходжання ў бальніцы.
У ваенныя Аляксей пайшоў па слядах бацькі. Скончыў Вайсковую акадэмію. Быў камандзірам аэрадромнай эксплуатацыйнай роты ў авіябазе «Мачулішчы», пасля — кіраўніком першага аддзела захоўвання ўзбраення, ваеннай і спецыяльнай тэхнікі. Выкладаць у Акадэміі ён стаў з 2018-га.
З жонкай Таццянай яны былі разам 20 год. Цяпер яна засталася адна з трыма дзецьмі: малодшай дзяўчынцы сем год, сярэдняму сыну — 9, старэйшай дачцэ — 17.
У бальніцу Аляксей трапіў яшчэ 25 красавіка. Спачатку быў у ваенным шпіталі, пасля яго перавялі ў Мінскі НПЦ хірургіі, транспланталогіі і гематалогіі.
«Заразіцца мог паўсюль… Аналізы на каранавірус узялі 25 красавіка, 2 мая зрабілі пераліванне плазмы з антыцеламі, каб выратаваць, хоць вынік тэсту яшчэ быў невядомы. 5 мая прыйшоў станоўчы вынік. Увесь гэты час муж быў у рэанімацыі і ў кіслароднай масцы», — успамінае Таццяна.
Апошні раз яна чула голас Аляксея 14 мая.
«Ён коратка паведаміў, што яго падключаюць да ШВЛ і ён усіх любіць, усё будзе добра», — успамінае тую размову жонка. Яна толькі нядаўна вярнулася з пахавання.
Нягледзячы ні на што, Таццяна ўдзячная медыкам, якія змагаліся за жыццё мужа:
«Асабліва дактары НПЦ на Сямашкі. Яны рабілі ўсё магчымае і немагчымае. Але не атрымалася…»
-
«Не проста запальваем, а адраджаем традыцыю». Ліхтаршчык з Брэста расказаў пра магію святла, гузік на ўдачу і старадаўнюю музыку
-
У вёсцы пад Брэстам мясцовыя жыхары рэгулярна канфліктуюць з адпачывальнікамі. Дайшло да абстрэлу электрамабіля
-
Беларусь займае другое месца па папулярнасці для студэнтаў з Расіі
Цяпер чытаюць
Паветраная гімнастка паказала закуліссе працы ў Белдзяржцырку7
Каментары