Трансфернае акно адкрылася адносна нядаўна, але пераход лета ўжо, здаецца, ажыццявіўся. Джасурбека Яхшыбоева сваталі ў БАТЭ і абодва «Дынама», але ўзбекскі вундэркінд для працягу кар'еры выбраў «Шахцёр».
Фота: ФК «Шахцёр».
Гэта не адзіная сур'ёзная страта «Энергетыка-БДУ»: крыху раней за Яхшыбоева каманду пакінуў Давід Твэ. Ліберыец стаў гульцом брэсцкага «Дынама».
Але берасцейцам пакуль асабліва не да трансфераў: захварэлі гульцы і супрацоўнікі клуба, з-за чаго нават пераносіцца наступная гульня каманды. Колькі гульцоў хварэе і дакладная прычына (меркаваная — каранавірус) прэс-службай не паведамляецца.
Праз кадравыя праблемы «Дынама» не змагло выйграць у Смалявічах, хаця выйгравала з лікам 2:0. Нічыя 3:3 з чэмпіёнам стала лебядзінай песня для каманды з прысталічча — гульцам прапанавалі істотна скараціць заробкі. Пагадзіліся адзінкі, астатнія разам з галоўным трэнерам Аляксандрам Бразевічам сышлі. Цяпер «Смалявічы» будуць выратоўваць дублёры мінскага «Дынама» і лавачнікі іншых каманд, якіх клуб арандаваў.
Фота: ФК «Смалявічы».
Пакуль на трансферным рынку ніяк сябе не праяўляе барысаўскі БАТЭ, які прайграў другі матч запар. Прычым «Энергетык-БДУ» з 20-й хвіліны гуляў у меншасці, а барысаўцы не змаглі забіць пенальці. Што тычыцца новых падпісанняў, то з БАТЭ трэніруецца гулец зборнай Мікіта Корзун, але перспектывы пакуль няясныя.
Вось вынікі матчаў 16 тура:
- «Славія» — «Слуцк» 3:1 (5, 12 (п), Слюсар; 75, Шаўчэнка — 21, Сямёнаў)
- «Смалявічы» — «Дынама-Брэст» 3:3 (48, Вакуліч; 56 (п), Мухамедаў; 79, Бутарэвіч — 3 (аг), Жэўнераў; 42, Паўлавец; 81 (п), Гардзяйчук)
- БАТЭ — «Энергетык-БДУ» 0:1 (23, Умараў)
- «Гарадзея» — «Віцебск» 2:2 (38, Сайчыч; 87, Архіпаў — 33, Нікалаеску; 58, Сантас)
- «Нёман» — «Іслач» 1:0 (90, Марушыч)
- «Мінск» — «Белшына» 2:2 (18 (п), Ал. Васільеў; 56, Грыбоўскі — 32, Нячаеў; 88, Нівалда)
- «Тарпеда-БелАЗ» — «Шахцёр» 1:4 (77, Прамудраў — 12, Іванавіч; 57, 83; Лісаковіч; 85, Падстрэлаў)
- «Рух» — «Дынама-Мінск» 1:0 (43, Багамольскі)
ТУРНІРНАЯ ТАБЛІЦА
А цяпер пераходзім да матчаў наступнага тура.
«Смалявічы» — «Іслач»
Першы іспыт абноўленых «Смалявічаў». У апошніх матчах камандзе ўдалося крыху выправіць становішча і наблізіцца да мяжы зоны вылету, але ў новых умовах захаванне прапіскі будзе справай амаль невыканальнай.
Здаецца, Мома Янсанэ не сыдзе з «Іслачы» ў «Шахцёр». Салігорцы арандавалі Яхшыбоева, і спартыўныя СМІ пішуць, што, хутчэй за ўсё, адмовяцца ад трансферу гвінейца. «Ваўкі» ж паспелі падстрахавацца і падпісалі некалі перспектыўнага ўкраінца Дзмітрыя Юсава, які мусіць дадаць варыятыўнасці ў атакуючую лінію «Іслачы». Паглядзім, якім будзе дэбют у Юсава.
Прагноз «НН»: перамога «Іслачы».
«Белшына» — «Тарпеда-БелАЗ»
- 11.07, 16:30. Бабруйск, стадыён «Спартак».
- Каэфіцыенты: «Белшына» (перамога) — 4.65; нічыя — 4.20; «Тарпеда» (перамога) — 1.76.
У Бабруйску спрабуюць хоць неяк выправіць становішча каманды, якая акапалася на апошнім радку. «Шыннікамі» сталі найлепшы бамбардзір першалігавых «Крумкачоў» Дзмітрый Лебедзеў і арандаваны ў жодзінскага «Тарпеда-БелАЗ» Дзяніс Лявіцкі.
Жодзінцы перажываюць вельмі нестабільны перыяд, які адбіўся на месцы каманды ў табліцы — «Тарпеда» ўжо шостае. Склад таксама актыўна абнаўляецца, а гульню супраць аўтсайдараў трэба выкарыстаць для выпраўлення становішча.
Прагноз «НН»: перамога «Тарпеда».
БАТЭ — «Славія»
Мы вышэй закранулі няўдалую серыю БАТЭ, але мы памятаем, як скончылася папярэдняя чорная паласа: лідарствам у табліцы і заваяваннем кубка. І апошнія матчы той серыі якраз прыпалі на матчы з мазырчукамі.
«Славія» ў папярэднім туры згуляла ў «воднае пола» са «Слуцкам» і абагнала случчакоў у табліцы. Вынік быў зроблены яшчэ ў пачатку гульні, калі яшчэ можна было паказваць хаця б нешта падобнае да футбола.
Фота: ФК «Славія».
У Барысаве, хутчэй за ўсё, такіх умоў надвор'я не будзе, таму трэба браць моцную жоўта-сінюю крэпасць іншым.
Прагноз «НН»: перамога БАТЭ.
«Шахцёр» — «Гарадзея»
- 11.07, 20:30. Салігорск, стадыён «Будаўнік».
- Каэфіцыенты: «Шахцёр» (перамога) — 1.32; нічыя — 6.25; «Гарадзея» (перамога) — 10.00.
Разгром у Жодзіне дазволіў «Шахцёру» дагнаць у табліцы БАТЭ. Асабліва прыгожым атрымаўся другі гол салігорцаў у выкананні Віталя Лісаковіча.
22-гадовы форвард праводзіць найлепшы сезон у кар'еры, і не дзівіць, што вядуцца размовы аб ягоным пераходзе ў іншыя каманды. Паведамляюць, што беларус вось-вось стане гульцом маскоўскага «Лакаматыва», але афіцыйнай інфармацыі пакуль не было.
Ці паспеюць пафеерыць разам Яхшыбоеў і Лісаковіч?
Прагноз «НН»: перамога «Шахцёра».
«Энергетык-БДУ» — «Рух»
- 12.07, 16:30. Маладзечна, стадыён «Гарадскі».
- Каэфіцыенты: «Энергетык» (перамога) — 1.96; нічыя — 3.95; «Рух» (перамога) — 3.90.
У абодвух каманд намецілася зайздросная серыя з трох матчаў без параз. Але калі ў «Руху» ўсё больш-менш стабільна, то «Энергетык» у стане пераменаў, пра прычыны якіх напісана вышэй.
«Студэнты» ўжо падпісалі расійскага паўабаронцу Міхаіла Башылава, вядомага па гульні за «Гарадзею» і «Белшыну», а таксама арэндавалі ў БАТЭ форварда Уладзіслава Мухамедава, які правёў палову сезона ў «Смалявічах». Варта чакаць і іншых падпісанняў, але ці зможа абноўленая каманда трымаць высока паднятую планку, невядома.
Прагноз «НН»: тотал меншы за 2.5.
«Дынама-Мінск» — «Мінск»
- 12.07, 18:30. Мінск, стадыён «Дынама».
- Каэфіцыенты: «Дынама» (перамога) — 1.83; нічыя — 4.00; «Мінск» (перамога) — 4.50.
Мінскае «Дынама» выдала чатыры матчы без параз (тры скончыліся перамогай) і прапушчаных мячоў, але ў выніку ў Брэсце ў другі раз за сезон прайграла «Руху». Пакуль мінчукі сёмыя, што зусім не адпавядае амбіцыям каманды.
Фота: ФК «Дынама-Мінск».
Клуб спрабуе выправіць сітуацыю шматлікімі падпісаннямі: «дынамаўцам» стаў бразілец Сілас, у трэці раз у каманду вярнуўся Дзінка Трэбаціч, тое самае плануе зрабіць Уладзімір Хвашчынскі.
«Мінску» адказаць пакуль няма чым.
Прагноз «НН»: перамога «Дынама».
«Віцебск» — «Нёман»
- 12.07, 20:30. ЦСК ФК «Віцебск».
- Каэфіцыенты: «Віцебск» (перамога) — 2.71; нічыя — 3.60; «Нёман» (перамога) — 2.69.
Завяршае тур гульня з цікавай вывескай.
За суперсерыяй «Нёмана» мы ўсе назіраем з захапленнем, але дома «Віцебск» не даў сябе абгуляць нікому з лідараў табліцы. Месца паўночнай каманды ў табліцы не павінна вас увесці ў зман.
Ці зможа прыдумаць Сяргей Ясінскі рэцэпт, як абгуляць «Нёман», альбо гарадзенцы здабудуць восьмую перамогу запар?
Прагноз «НН»: тотал меншы за 2.5.
Гульня «Дынама-Брэст» — «Слуцк» перанесеная на 12 жніўня.
У сувязі з распаўсюдам каранавіруса мы не раім вам наведваць людныя мерапрыемствы, у тым ліку футбольныя матчы. Калі ўсё ж вырашыце пайсці на стадыён, прытрымлівайцеся мераў засцярогі.
Дзяліцеся прагнозамі ў каментарах. Калі лічыце сябе экспертам у беларускім футболе, зрабіце стаўку ў Букмекерскай канторы Леон!
