У Астрыне (Шчучынскі раён) школа носіць імя славутай паэткі, і на бачным месцы — помнік ёй, а ў школе — адзіны музей Цёткі (Алаізы Сцяпанаўны Пашкевіч).
Ля імправізаванай сцэны сабраліся астрынчане, госці. Гучала натхнёнае мастацкае слова з вуснаў работнікаў клуба, вершы Цёткі і свае чыталі Рычард Бялячыц і ўдзельнікі створанага ім Паэтычнага салона пры Шчучынскім палацы творчасці Марына Радзівон і Іван Ляўковіч. Прагучалі прысвячэнні палымянай беларусцы ад Любові Русілкі і Наталлі Цвірко. Свае лірычныя вершы прачыталі кіраўнік музея Ала Балобан і настаўніца Таццяна Чарняк. Гурткоўцы Ганны Сцяпанчанкі, бібліятэкара і гаспадыні святочнай імпрэзы, прынялі ўдзел у конкурсе на лепшае чытанне твораў Цёткі.
Удзельнікі свята прынеслі да помніка паэтцы простыя мілыя кветкі, якія так любіла Алаіза. Экскурсія з аглядам багатых музейных экспазіцый у чарговы раз пацвердзіла заўсёдную ўлюбёнасць у вобраз беларускай пясняркі яго захавальніцы Алы Балобан і дазволіла зноўку адчуць глыбіню Цётчынай душы і яе «палымянае сэрца».
Прыгожыя песні з канцэртнай святочнай праграмы слухала, здаецца, і яна, міласэрная дэмакратка Пашкевічанка. А насупраць спыняліся аўто, што ехалі на Гродна ці з яго, затрымліваліся прахожыя.
Свята атрымалася цёплым і кранальным.
