Ён заклапочаны трывожнымі тэндэнцыямі ў эканоміцы.
Пра змены ў складзе ўрада, якія маюць адбыцца, заявіў Аляксандр Лукашэнка 16 красавіка падчас разгляду кадравых пытанняў, паведаміў Першы канал.
«Хто сёння не можа працаваць, той сыдзе, — заявіў беларускі кіраўнік. — Хто можа працаваць ва ўрадзе, у адміністрацыі, на вашых пасадах, той будзе працаваць.
Літаральна праз тыдзень‑два будуць праведзены прызначэнні больш істотныя, якія тычацца некаторых членаў урада, некаторых кіраўнікоў рэспубліканскіх органаў улады і кіравання».
Паводле слоў А.Лукашэнкі, вынікі працы эканомікі ў першым паўгоддзі пакажуць «абсалютна дакладна і аголена, калі хочаце, на што мы здольныя і ці зможам мы ў гэтай сітуацыі выжыць», «якая ў нас дынаміка, ці ёсць у нас тэндэнцыя да паляпшэння».
А.Лукашэнка заявіў пра недапушчальнасць карупцыі і «расхлябанасці кадраў». «Сёння ў Гомельскай вобласці паводле майго даручэння завершана праверка паляўнічай гэтак званай справы, дзе вялікія начальнікі міліцыі, кіраўнікі буйных прадпрыемстваў, кіраўнікі Гомельшчыны папалявалі так, што сёння даводзіцца ў межах крымінальнай справы разбірацца, — паведаміў А.Лукашэнка. — Я не буду забягаць наперад, пра гэта людзі даведаюцца, але даравання не будзе нікому. Паляўнічы? Палюй. У нас ёсць закон, калі ласка, аб’ядноўвайцеся, збірайцеся, купляйце ліцэнзію і рабіце гэта сумленна. Недапушчальна, каб людзі, надзеленыя ўладай, якія яе ўвасабляюць, нахабна парушалі закон».