На трасе сілавікі спынілі аўтобус з Ціханоўскай і штабам. Але яна ўсё ж прыехала на шматтысячны мітынг у Барысаве
На трасе сілавікі спынілі аўтобус з Ціханоўскай і штабам. Пра гэта паведаміла ў сваім стрыме Вольга Кавалькова. Супрацоўнікі правяралі дакументы.
20 хвілін трымалі машыну Ціханоўскай на дарозе. Урэшце яна перасела ў іншую машыну і спазнілася на мітынг на 20 хвілін.
Пікет на пляцоўцы каля ўнівермага «Веста» ў Барысаве (вул. Гагарына 105А) пачаўся без Святланы Ціханоўскай.
Людзі ўжо чакаюць Ціханоўскую ў Барысаве. Карэспандэнт НН налічыў ужо больш за 3000 чалавек.
Пляцоўка, выдзеленая пад сустрэчу з кандыдатам, цалкам поўная. Гэта самы масавы мітынг у Барысаве за апошнія гады.
На пляцоўцы іграюць беларускамоўныя песні, арганізатары раздаюць белыя стужкі.
Сілавікі затрымалі таксама машыну з супрацоўнікамі тэлеканала «Белсат». Едуць у РАУС правяраць нумар кузава.
На падыходзе да агітацыйнага пікета Святланы Ціханоўскай, які запланаваны на 19:00, былі затрыманы актывісты і актывісткі «Народнай Грамады» і «Еўрапейскай Беларусі» Алена Філатава, Андрэй Кірэеў, Вольга Нікалайчык, Андрэй Войніч. Магчыма, затрыманых больш. Як паведамляе актывіст Валянцін Троцкі, таксама няма сувязі з Валянцінам Фраловым і іншымі. Прозвішчы затрыманых і падставы затрымання высвятляюцца, пішуць праваабаронцы.
У 19:22 Ціханоўская з'явілася на сцэне разам з прадстаўнікамі свайго штабу. «Света! Света!» — скандавалі людзі.
З машыны да пляцоўкі яна прайшла ў атачэнні чатырох мужчын у майках «Краіна для жыцця». Людзі сустрэлі яе бурнымі воплескамі і скандаваннем «Света! Света!». Яе прамова суправаджалася шматлікімі апладысментамі.
Ціханоўская кажа, што яна не палітык, ёй не патрэбна ўлада, яна хоча таго, каб у Беларусі прайшлі сумленныя і справядлівыя выбары, каб наша Беларусь змянілася стала лепшай.
«Я заклікаю галасаваць толькі 9 жніўня, а потым адстойваць свой голас. Калі мы не прыйдзем галасаваць, то гэта будзе перамога ўлады», — кажа Ціханоўская.
У сваёй прамове Ціханоўская раскрытыкавала палітычную і сацыяльную сітуацыю ў краіне.
«Света, Света», — не змаўкаюць людзі.
Ціханоўская абяцае, што будзе прэзідэнтам не больш за паўгода. Яе галоўная мэта — забяспечыць новыя сумленныя выбары.
Пасля Ціханоўскай на сцэну выйшла прадстаўніца штаба Марыя Калеснікава.
«Сілком не будзеш любы. Сілком не будзеш прэзідэнтам», — звяртаецца да ўладаў Калеснікава.
Калеснікава паўтарыла свае словы пра тое, што штаб дзейнічае выключна законнымі метадамі, а ўлада адказвае гвалтам. Таксама яна паўтарыла словы пра тое, што аўтазак — гэта ўсяго толькі машына.
«Маша, Маша», — крычаў натоўп.
Цікава, што міліцыя на шматтысячным мітынгу наогул незаўважная.
Каментары