Фота Надзеі Бужан
Галоўным следчым упраўленнем цэнтральнага апарата СК у дачыненні да Сяргея Ціханоўскага распачаты шэраг крымінальных спраў, адзначаецца ў прэс-рэлізе.
Так, у дачыненні да яго заведзена крымінальная справа па ч. 3 арт. 130 Крымінальнага кодэкса Рэспублікі Беларусь па фактах здзяйснення наўмысных дзеянняў, накіраваных на распальванне іншай сацыяльнай варожасці, заклікаў да здзяйснення гвалтоўна-агрэсіўных дзеянняў у адносінах да супрацоўнікаў праваахоўных органаў [да 12 гадоў зняволення].
Акрамя таго, у дачыненні да М. Статкевіча, С. Ціханоўскага і іншых асоб распачата крымінальная справа па факце падрыхтоўкі да масавых беспарадкаў па арт. 13 ч. 2 арт. 293 Крымінальнага кодэкса Рэспублікі Беларусь.
Таксама СК паведамляе, што ўчора па выніках праверкі аператыўнай інфармацыі, якая паступіла ад спецслужбаў, па падазрэнні ў здзяйсненні названага злачынства былі затрыманыя 33 грамадзяніны Расійскай Федэрацыі, супрацоўнікі ПВК «Вагнера», якія пражывалі на тэрыторыі санаторыя «Беларусачка» ў Мінскім раёне.
Вырашаецца пытанне аб прымяненні да іх меры стрымання ў выглядзе заключэння пад варту.
Працягваецца правядзенне следчых дзеянняў і аператыўна-вышуковых мерапрыемстваў, накіраваных на ўстанаўленне асоб, якія маюць дачыненне да падрыхтоўкі і арганізацыі масавых беспарадкаў на тэрыторыі краіны, гаворыцца ў прэс-рэлізе.
