Магчымую другую хвалю каранавіруснай інфекцыі ў Беларусі чакаюць у лістападзе — снежні. Пра гэта 30 ліпеня ў сярэдняй школе №3 у Ганцавічах у Брэсцкай вобласці распавяла намеснік міністра аховы здароўя Алена Богдан, выступаючы перад выбарцамі. Цяпер яна давераная асоба кандыдата ў прэзідэнты Аляксандра Лукашэнкі, піша tut.by.

Адказваючы на адно з пытанняў, Алена Богдан распавяла, што выпадкі каранавіруса ў краіне па-ранейшаму фіксуюцца і сістэма аховы здароўя рыхтуецца да магчымай другой хвалі.

— Згодна з разлікамі мы чакаем магчымую другую хвалю каранавіруснай інфекцыі ў лістападзе — снежні, — адзначыла намеснік міністра.

Спецыяліст распавяла, як менавіта сістэма аховы здароўя да яе рыхтуецца. Па-першае, папаўняюцца запасы індывідуальных сродкаў абароны: ад рэспіратараў трэцяга класа абароны да пальчатак, якія мы закупляем у Малайзіі.

Па-другое, ствараецца неабходны запас лекаў.

— З тым, што вырабляецца ў краіне, у нас пытанняў няма: антыбіётыкі зробленыя, простыя гепарыны зробленыя (прэпараты, якія прымяняюцца для прадухілення згусальнасці крыві. — Заўв. TUT.BY), сродкі для наркозу зробленыя, гарачкапаніжальныя зробленыя, запасы супрацьгрыпознага прэпарата мы таксама зрабілі, нягледзячы на тое, што ён не дзейнічае на каранавірус.

Па словах спецыяліста, у нас дастатковы запас прэпарата для лячэння малярыі — гідраксіхларахіну, таксама ёсць нізкамалекулярныя гепарыны — іх закупілі, нягледзячы на тое, што фармкампаніі выставілі больш высокую цану. Аднак пакуль не вырашана пытанне з антывірусным прэпаратам рэмдэсівір.

— У нас узнікае пытанне па рэмдэсівіру. ЗША — арыгінатар (той, хто вырабляе), і яны выкупілі 90% вытворчасці рэмдэсівіру да канца года. Таму сёння наша задача купіць джэнерык (прэпарат, які капіюе арыгінал) і, самае галоўнае, на нашых фармацэўтычных прадпрыемствах стварыць хоць кавалачак вытворчасці.

Клінічныя пратаколы па лячэнні пацыентаў з COVID-19 пакуль мяняць не будуць, таму што яны, па словах намесніка міністра, працаздольныя.

Алена Богдан распавяла, што, рыхтуючыся да магчымай другой хвалі, працягваецца рэканструкцыя бальніц, якія будуць апорнымі для аказання дапамогі пацыентам з каранавірусам. Там у тым ліку робяць дадатковыя кропкі кіслароду. Падчас другой хвалі медыкі будуць старацца ў першую чаргу справіцца сіламі тэрапеўтычных аддзяленняў.

Таксама ўжо распрацавалі электронную сістэму маніторынгу захворванняў, і гэтую сістэму плануюць усталяваць на аддаленыя працоўныя месцы, каб падчас другой хвалі інфармацыю збіралі не ўручную, а была адзіная сістэма з аддаленым доступам.

— Яшчэ адна наша задача — падрыхтавацца не толькі да другой хвалі, але і не дапусціць цыркуляцыі сезоннага віруса грыпу. Наша задача ў верасні — кастрычніку правесці вакцынацыю насельніцтва ад грыпу, — сказала Алена Богдан.

Яна таксама адзначыла, што ў барацьбе з каранавіруснай інфекцыяй вясной-летам нам у тым ліку дапамог вялікі ложкавы фонд у бальніцах. Паводле яе слоў, у нас 10 ложкаў на 1 тысячу насельніцтва. Таксама яна сказала, што ў краіне дагэтуль ёсць фельчарска-акушэрскія пункты ў месцах, дзе пражываюць 130-150 чалавек.

Паводле звестак Міністэрства аховы здароўя на 30 ліпеня, у краіне 67 665 выпадкаў COVID-19 з пачатку пандэміі. Ачунялі 61 765 пацыентаў, памерлі 553 чалавекі.

Хочаш падзяліцца важнай інфармацыяй ананімна і канфідэнцыйна?

2
LitvinM / Адказаць
31.07.2020 / 07:59
А хіба ў нас першая скончылась?
У нас першая плаўна перацячэ ў другую
4
Хэльвіг / Адказаць
31.07.2020 / 08:24
Цікавая лёгіка ў сп-ні Богдан, з т.зв. першай хваляй каранавірусу афіцыйна ніхто не змагаўся. Не абвешчалася пра жадныя захады бясьпекі, г.зн. карантын, абавязковае нашэньне масак, закрыцьцё дзяржаўных межаў і г.д. Адзін вядомы "вірусолаг" нават сказаў, што гэта звычайны "псыхоз", па гэтым трызьненьні сівой кабылы міністр аховы здароўя сп. Каранік таксама не выказаўся, толькі, як кітайскі Буда, усё хітае галавою, баіцца страціць фатэль, т.б. пасаду. А тут раптам яны ўжо рыхтуюцца да другой хвалі каранавірусу, не спыніўшы першай. Пакуль краінай будзе кіраваць неадукаваны калгасьнік, які даўно прагапіў свой цягнік часу, гэты маразм і тэатар абсурду будзе працягвацца бясконца.
4
ВольгаP / Адказаць
31.07.2020 / 08:59
Мяне цiкавiць адзiнае пытанне: чаму да сяго часу немагчыма даведацца аб агульнай смяротнасцi за першае паугоддзе? Хай бы рэдакцыя запыталася у каго с адказных асоб.
Паказаць усе каментары/ 15 /
Каб пакінуць каментар, калі ласка, актывуйце JavaScript у наладах свайго браўзеру