БелТА
Аляксандр Лукашэнка абмеркаваў з кіраўніком часовай адміністрацыі ААТ «Белгазпрамбанк» Надзеяй Ермаковай сітуацыю ў банку і падзякаваў за праведзеную працу, піша БелТА.
«Я, Надзея Андрэеўна, чаму запрасіў вас публічна (збіраўся даўно, але хапала працы тут): перш за ўсё, хачу табе падзякаваць, што ў цяжкі момант адгукнулася і фактычна выратавала банк і працоўны калектыў», — сказаў кіраўнік дзяржавы.
Ён адзначыў, што Надзея Ермакова добра ведае сітуацыю ў банку. «Вельмі б прасіў, каб парадак быў у банку, банк губіць нельга.
Гэта банк, які, калі «Газпрам» ад яго адмовіцца, Гасподзь з імі.
Працоўны калектыў ёсць, навыкі ёсць, магчымасці будуць. Мы Нацыянальным банкам будзем падтрымліваць гэты банк: там жа нашы людзі і нашы прадпрыемствы. Так, трапілі ў складаную сітуацыю з-за гэтых карупцыйных праяў, але ў нас ёсць вопыт утрымання не проста на плаву банкаў, але і нармальнага іх функцыянавання», — падкрэсліў беларускі кіраўнік.
Аляксандр Лукашэнка дадаў, што, як дакладваў яму старшыня Камітэта дзяржкантролю Іван Церцель, няма катастрофы ў банку. «Вам удалося з Лядніцкай (Ілона Лядніцкая — намеснік старшыні Нацыянальнага банка) стабілізаваць сітуацыю. Я таксама вельмі ўдзячны ёй, перадайце маю падзяку. Я зраблю ўсё для таго, каб і людзі, якія ўклалі свае грошы, і нашы прадпрыемствы нічога не страцілі. З нашага боку, з боку дзяржавы, мы зробім усё неабходнае», — запэўніў Лукашэнка.
«Асаблівай зацікаўленасці газпрамаўскай я не бачу, хоць, калі мы размаўлялі з прэзідэнтам Расіі, ён мне таксама рэкамендаваў: кажа, што банк можа працаваць, не бедныя ў яго ўласнікі — даслоўна.
Таму, калі табе патрэбен гэты банк, ён мне сказаў, значыць, паспрабуйце спрацаваць так, каб гэты банк працаваў. Я кажу: мы толькі за, мы супраць не будзем, але ён павінен працаваць па нашых законах. Таму яшчэ раз удзячны за тое, што зроблена за гэты час у гэтым банку», — рэзюмаваў Аляксандр Лукашэнка.
Віктар Бабарыка ўзначальваў Белгазпрамбанк з 2000 па май 2020 года, пасля таго як ён заявіў пра ўдзел у прэзідэнцкіх выбарах, у банка з'явіліся везізарныя праблемы. Фота Надзеі Бужан
