Дар'я Бялько жыве ў шматпавярховіку на Смаргоўскім тракце ў Мінску. Два тыдні таму іх сям'я павесіла на ўвесь балкон тканіну ў выглядзе бел-чырвона-белага сцяга.
У панядзелак, калі Дар'я была дома адна, у дзверы настойліва пагрукалі двое мужчын без формы. Дзяўчына, спужаўшыся, патэлефанавала мужу, той — у міліцыю.
«Прыйшлі міліцыянты, паглядзелі на запіс дамафона, сказалі, што гэта былі іх супрацоўнікі. Удакладнілі, ці ёсць у нас зброя. Атрымаўшы адмоўны адказ, папрасілі зачыніць вокны, маўляў, побач праходзяць нейкія мерапрыемствы. Балкон яны не бачылі», — расказвае Дар'я.
Першыя два мужчыны без формы тым часам звярнуліся да старшыні таварыства. Муж Дар'і пасля пагутарыў з імі. На загад прыбраць сцяг з балкона спытаў: «Чаму я павінен прыбіраць штору?» Яму сказалі, што ёсць скарга ад жыхара, якому не падабаецца, і ўвечары разбірацца прыйдзе ўчастковы.
Але замест ўчастковага зноў на парозе з'явіліся міліцыянты ў штацкім.
«Паказалі пасведчанне, папрасілі адчыніць дзверы. Паводзілі сябе ветліва, сказалі, ці я сама здымаю сцяг, ці яны, бо мы парушаем закон. Пасля тэлефоннай размовы з мужам пайшлі і сарвалі тканіну, сказалі, што канфіскуюць», — апісвае візіт дзяўчына.
Свае дзеянні міліцыянты аргументавалі артыкулам 21.13 КаАП (парушэнне архітэктурнага рашэння фасада будынка). Вярнуць сцяг паабяцалі пазней, калі складуць пратакол.
Гэта ўжо не першы выпадак палявання на бел-чырвона-белую сімволіку ў Цэнтральным раёне. У той жа дзень на вуліцы Гая сцяг з балкона знялі рабочыя, пакуль гаспадыні кватэры не было дома.
Чытайце таксама. Міліцыя пра зняты з балкона бел-чырвона-белы сцяг: Ён абразіў маральныя прынцыпы мінчука
