У аператыўна-дзяжурную службу Ленінскага РАУС з заявай звярнуўся 88-гадовы жыхар горада, які распавёў, што невядомы чалавек на працягу ліпеня выносіў маёмасць з яго гаража, размешчанага ў адным з блокаў па вуліцы Крупскай, паведамляе абласная міліцыя.
Пенсіянер пералічыў выкрадзенае за гэты час: рухавік з каробкай перадач, камплекты колаў, бампер ад аўтамабіля, металічныя вароты. Агульная сума нанесенай шкоды склала больш за 1870 рублёў, паведамляе УУС Магілёўскага аблвыканкама.
Супрацоўнікі аддзела крымінальнага вышуку Ленінскага РАУС па падазрэнні ў датычнасці да названых падзей затрымалі 52-гадовага жыхара горада, які нагледзеў чужы гараж для асабістых патрэб.
Ён зрэзаў два навясныя замкі і пасяліўся ўсярэдзіне не прыналежнага яму памяшкання. Пасля, асмялеўшы, мужчына стаў запрашаць туды сваіх прыяцеляў, з якімі яны разам і распівалі спіртныя напоі, і засталіся начаваць. Калі праз тыдзень злачыннага правядзення часу ўладальнік гаража так і не з’явіўся, зламыснік стаў распрадаваць чужую маёмасць, а пасля нацэліўся на аўтамабіль, які стаяў там жа. Аднак ён паспеў толькі зняць з машыны рухавік — шакаваны ўладальнік гаража ўсё ж такі прыйшоў і выявіў, у што ператварылася прыналежнае яму памяшканне. Ён адразу ж выклікаў праваахоўнікаў. Удалося высветліць, што ў планах у гаражнага «захопніка» быў нават яго продаж — на гэтай здзелцы ён таксама планаваў зарабіць грошы, якія пасля выдаткаваў бы на спіртныя напоі.
