Фота Надзеі Бужан
Учорашні вечар Карына Ласкавец разам з сябрамі правяла ў Цэнтральным РУУС. Кампанія аказалася ў аддзяленні міліцыі за тое, што фатаграфавалася ў цэнтры горада. Па словах дзяўчыны, каля дзевяці вечара туды ж даставілі Уладзіслава Сакалоўскага і Кірыла Галанава, гукарэжысёраў, якія ўключылі «Перамен» Цоя ў Кіеўскім скверы падчас раённага свята, піша Tut.by.
— Калі мы ўжо былі ў міліцыі, пачулі, як абмяркоўваліся артыкулы, па якіх іх збіраліся даставіць. Здаецца, арт. 17 (арт 17.1 Дробнае хуліганства) і непадпарадкаванне (арт 23.4 КаАП). Хлопцы выглядалі збітымі. У высокага чалавека з доўгімі валасамі (Уладзіслава) лоб і вочы былі проста чырвонымі-чырвонымі. У другога адна палова твару была чырвонай, і ён прыкладваў бутэльку, каб не было ацёку, — распавядае Карына Ласкавец.
Дзяўчына разам з сябрамі аказалася ўчора ў аддзяленні міліцыі за тое, што фатаграфавалася насупраць Палаца Рэспублікі. Карына была ў белай сукенцы з чырвоным гарсэтам і здымалася на фоне белай прасціны.
— Палічылі, што мы ствараем правакацыю, — дзяўчына тлумачыць, за што яе затрымалі. — Хлопцы (Уладзіслаў і Кірыл) сядзелі моўчкі, мы спрабавалі спытаць з сябрамі за што, але на іх так глядзелі амапаўцы, што, здаецца, яны баяліся што-небудзь адказаць. А потым іх рассадзілі.
Карыну адпусцілі бліжэй да 22:00, як сцвярджае дзяўчына, пратакол у дачыненні да іх кампаніі не быў складзены, усё абышлося «ветлівай гутаркай».
Як паведаміў Мікіта Галанаў, брат затрыманага Кірыла, учора ўначы ён прыехаў у Цэнтральнае РУУС, каб напісаць заяву аб знікненні. І толькі пасля гэтага паведамілі, што ён знаходзіцца ў ЦІП.
На праўладным мерапрыемстве дыджэі ўрубілі «Перамен!» Цоя ВІДЭА
