Сто стыпендыятаў, лаўрэатаў, прэміянтаў і дыпламантаў Спецыяльнага фонду прэзідэнта Рэспублікі Беларусь па падтрымцы таленавітай моладзі і адораных студэнтаў і навучэнцаў адмовіліся ад звання і ўсіх прывілеяў. Таксама яны апублікавалі адкрытую заяву — TUT.BY прыводзіць яе.
«Немагчыма насіць званне лаўрэата стыпендыі прэзідэнта, калі прэзідэнт дапускае ў краіне падман і зверскае збіццё сваіх жа суграмадзян», — так растлумачылі свае дзеянні маладыя людзі, даслаўшы нам ліст.
Тэкст самога ліста ад стыпендыятаў, лаўрэатаў, прэміянтаў і дыпламантаў прыводзім ніжэй:
«Мы заяўляем: нам сорамна несці гэтае званне. Так здарылася, што беларусы больш не адчуваюць сябе ў бяспецы ў сваёй краіне. Мы не можам спакойна знаходзіцца на вуліцы, мы не можам выказваць сваё меркаванне, у краіне пануе атмасфера абурэння і страху. Дзявятага жніўня былі праведзеныя выбары прэзідэнта РБ, вынікі якіх выклікаюць сумневы ў большасці беларускіх грамадзян, якія пражываюць у краіне і за яе межамі. Народ зрабіў свой выбар, але чамусьці гэты выбар не быў улічаны. Мы назіралі маніпуляцыі са складам і ціск на выбарчыя камісіі, непавагу да незалежных назіральнікаў і абуральныя парушэнні выбарчага працэсу. Мы не прызнаём афіцыйныя вынікі гэтай прэзідэнцкай кампаніі.
Тое, што адбываецца апошнія дні, не адпавядае прынцыпам свабоднага дэмакратычнага грамадства і статуту Канстытуцыі. Мы бачылі, з якой жорсткасцю затрымліваюць мірных пратэстантаў і мінакоў, мы ведаем, як далей працуе судовая сістэма, мы чулі пра нечалавечыя ўмовы ўтрымання палітвязняў у турмах. Народ хоча і мае права мірна выказаць сваё меркаванне, і гэты народ — гэта не праплочаныя з-за мяжы «адмарожаныя», народ — гэта ўсе мы.
Мы патрабуем:
- адстаўкі Лукашэнкі Аляксандра Рыгоравіча з пасады прэзідэнта Рэспублікі Беларусь
- вызвалення ўсіх палітзняволеных і затрыманых падчас гэтай прэзідэнцкай кампаніі і ў мірных акцыях пратэсту, звязаных з ёй
- спынення гвалту з боку міліцыі, АМАПу і арміі ў адрас мірных грамадзян
- спынення пераследу журналістаў незалежных СМІ і скажэння інфармацыі ў дзяржаўных СМІ
- правядзення новых, сумленных выбараў з допускам міжнародных і незалежных назіральнікаў і празрыстым падлікам галасоў.
Тыранія не спрыяе развіццю. Тыранія, як Чорная дзірка, паглынае ўсё светлае і прыгожае. Мы адмаўляемся ад усіх званняў і прывілеяў, звязаных са Спецыяльным фондам прэзідэнта Рэспублікі Беларусь па падтрымцы таленавітай моладзі і адораных студэнтаў і навучэнцаў, у імя справядлівасці і міру. Грашовыя сродкі намі, па магчымасці, будуць пералічаныя ў фонд падтрымкі рэпрэсаваных, пацярпелых і аштрафаваных».
А што ў іх былі за стыпендыі?
TUT.BY звязаўся з адным з лаўрэатаў прэміі Уладзіславам Кулікоўскім:
— Мы ўжо адправілі заявы на выхад з фонду — усе сто чалавек. Грошы ўсе атрымлівалі розныя: камусьці іх выплачвалі гадамі, камусьці — разава. У некаторых былі льготы на жыллё, у некаторых — на паступленне. Што тычыцца мяне, гэта была разавая выплата. Дарэчы, зробленая была вельмі цікава: прызначаная за два тыдні да дэвальвацыі. На той момант тая сума была эквівалентная 1000 далярам.
Таксама Уладзіслаў заўважыў, што фонд даваў прывілеі ў выглядзе запрашэнняў на мерапрыемствы з удзелам найвышэйшых асоб дзяржавы.
Спецыяльны фонд Прэзідэнта Рэспублікі Беларусь па падтрымцы таленавітай моладзі створаны Указам Прэзідэнта Рэспублікі Беларусь № 18 ад 12 студзеня 1996 года. Яго прызначэнне — фінансаванне мерапрыемстваў, накіраваных на стварэнне ўмоў для пошуку, станаўлення і творчага развіцця адоранай моладзі. Сродкі ў фонд вылучаюцца з рэзервовага фонду прэзідэнта Рэспублікі Беларусь, добраахвотных узносаў у выглядзе грашовых сродкаў грамадзян Рэспублікі Беларусь, замежных грамадзян і асоб без грамадзянства, а таксама юрыдычных асоб і іншых паступленняў.
