«Неадэкватныя дзеянні павінны быць расследаваныя, а вінаватыя панесці пакаранне»: заява Тадэвуша Кандрусевіча наконт блакавання Чырвонага касцёла
Мітрапаліт Мінска-Магілёўскі, кіраўнік беларускіх католікаў арцыбіскуп Тадэвуш Кандрусевіч пракаментаваў блакаванне мінскімі амапаўцамі Чырвонага касцёла на Плошчы Незалежнасці: сілавікі зачынілі дзверы ў касцёл, не даючы туды ўвайсці людзям, некалькі дзясяткаў чалавек не маглі адтуль выйсці. Там былі вернікі, а таксама тыя, хто ратаваўся ад хапуна, журналісты.
«Знаходзячыся за мяжою, я з вялікім болем успрыняў скупыя звесткі пра блакаванне ўзброенымі байцамі АМАПа ўваходу і выхаду ў мінскім Чырвоным касцёле, што мела месца 26 жніўня.
У адпаведнасці з Канстытуцыяй Рэспублікі Беларусь, людзі маюць права маліцца, свабодна заходзячы для гэтага ў касцёл і бесперашкодна выходзячы з яго. Блакаванне выхадаў святыні і стварэнне перашкоды для свабоднага ўваходу і выхаду людзей з’яўляецца грубым парушэннем правоў вернікаў і свабоды веравызнання.
У сувязі з гэтым інцыдэнтам я цалкам падтрымліваю зробленую ў маю адсутнасць заяву Генеральнага вікарыя Мінска-Магілёўскай архідыяцэзіі біскупа Юрыя Касабуцкага і як Старшыня Канферэнцыі Каталіцкіх Біскупаў у Беларусі заяўляю свой рашучы пратэст супраць неправамерных дзеянняў сілавых структур, якія па сваім прызначэнні пакліканы абараняць асноўныя правы грамадзян, у тым ліку і права на свабоду веравызнання, а не перашкаджаць у іх рэалізацыі, гарантаванай заканадаўствам Рэспублікі Беларусь.
Неадэкватныя і супрацьпраўныя дзеянні, якія мелі месца на тэрыторыі касцёла святога Сымона і святой Алены, павінны быць расследаваны, а вінаватыя панесці пакаранне ў адпаведнасці з заканадаўствам Рэспублікі Беларусь.
Гэтыя і падобныя дзеянні супрацоўнікаў сілавых структур не спрыяюць зняццю напружанасці дзеля хутчэйшага ўсталявання міру і згоды ў беларускім грамадстве ў той час, калі Каталіцкі Касцёл заклікае да прымірэння і дыялогу з мэтаю вырашэння нябачанага ў нашай краіне сацыяльна-палітычнага канфлікту.
З малітваю за нашу адзіную Бацькаўшчыну Беларусь, — цытуе словы арцыбіскупа catholic.by
Затрыманні на плошчы Незалежнасці. Мужчын хапалі, жанчын адпускалі, заблакавалі дзверы Чырвонага касцёла
Туск заявіў пра гатоўнасць адкрыць Баброўнікі і Кузніцу з лістапада63
Каментары