26.04.2009 / 11:47

Чарнобыльскі Шлях 33

У Мінску прайшла традыцыйная акцыя апазіцыі, прымеркаваная да 23-х угодкаў катастрофы на Чарнобыльскай АЭС.

14:46 Выступіў з прамовай Павел Севярынец, ён таксама прачытаў "Ойча наш", праспяваў "Магутны Божа" і прапанаваў паставіць свечкі.

Акцыя скончана.

14:36 Удзельнікі акцыі (250-300 чалавек) дайшлі да капліцы, што за плошчай Бангалор.

14:09 Ад Вайсковых могілак, што на вуліцы Казлова, у бок праспекта паехала тры аўтобусы з міліцыяй і адзін аўтазак. Праўда, у "цывільнай" форме, без касак.

13:59 Галава калоны ўжо дайшла да вуліцы Куйбышава.

13:49 Калона рухаецца па прапанаваным Мінгарвыканкамам маршруце: Хмяльніцкага, Куйбышава і г.д. Прычым першымі збочылі на гэты маршрут анархісты і сябры БХД.

13:41 Удзельнікі акцыі пайшлі назад.

13:33 Калона падышла да ланцугу АМОНа, стаяць насупраць. Ніхто не кратаецца. Колькасць калоны зменшылася да 300 чалавек.

13:21 Калона марудна ідзе ў бок АМОНа. Каля амонаўцаў стаіць граф Прушынскі і гукае "Жыве Бялорусь".

13:16 Ля будынка БНТУ стаіць АМОН. Каля 40 чалавек.

13:00 Віктар Івашкевіч заклікаў перайсці на іншы бок праспекта (праз падземны пераход) і рухацца калонай ходнікамі ў бок Плошчы Якуба Коласа.

Супрацоўнікі міліцыі праводзяць ператрус у офісе ініцыятывы "Хартыя-97". Яны спыталіся, чаму ў памяшканьні столькі кампутараў і чаму на маніторах партрэты Аляксандра Лукашэнкі. Міліцыянты сказалі, што нехта з кватэры скраў ровар, перадае радыё Свабода.

12:54 Мітынг працягваецца, яго слухае няшмат народу.

Частка людзей пачала сыходзіць, як, напрыклад, сябры незарэгістраванага "Правага альянсу".

Уздоўж праспекта пашыхтаваліся ўжо сябры "Маладой Беларусі", "Еўрапейскай Беларусі", "Моладзі БНФ".

12:41 Зараз ля Акадэміі навук 700-800 чалавек. Выступіў Лявон Баршчэўскі, ён сказаў, што адмаўляецца ісці прапанаваным Мінгарвыканкамам маршрутам, "бо там праход 1,5 м", але цяпер пойдзе з міліцыяй пераканацца пра сапраўды вузкі пераход.

АМОН уварваўся ў офіс Хартыі'97, паведаміла рэдактарка Наталля Радзіна.

Мітынг ля Акадэміі навук вядзе прафесар Юры Хадыка.

12:28 Старшыню Партыі БНФ Лявона Баршчэўскага намеснік начальніка мінскай міліцыі папярэдзіў накнот адказнасці, калі ўдзельнікі акцыі не пойдуць па прапанаваным маршруце вуліцамі Хмяльніцкага, Куйбышава, Сурганава на плошчу Бангалор.

Лявон Баршчэўскі адказаў, што там няма як ісці, няма нармальнай дарогі: "Мы патопчам траву, нам дадуць штраф 6 млн, а ў нас такіх грошай няма".

Пачаўся мітынг. Выступае прафесар Іван Нікітчанка. Нейкая жанчына трымае плакат: "Дзе Вы, мужыкі?" з эмблемай АДС.

12:11 Ля Акадэміі навук ужо каля 500 чалавек.

Вельмі актыўна сябе паводзяць анархісты. Іх каля 70-80 чалавек. Яны сталі ў квадрат, б'юць у барабаны, трымаюць расцяжкі: "Альтернатива АЭС - есть".

З палітычных лідэраў у акцыі бяруць удзел намеснік старшыні Партыі БНФ Віктар Івашкевіч, лідэр апазіцыйных камуністаў Сяргей Калякін, каардынатар Хартыі'97 Андрэй Саннікаў, сустаршыня БХД Павел Севярынец, пакуль яшчэ старшыня БСДП Грамада Анатоль Ляўковіч, моладзевыя лідэры Артур Фінькевіч і Яўген Афнагель.

12:03

Ля Акадэміі навук а 12-й сабралася каля 200-250 чалавек. Людзі трымаюць каля паўтара дзясятка бел-чырвона-белых сцягоў.

Як і мінулыя гады актыўнічаюць анархісты. Яны прыйшлі з чырвона-чорнымі сцягамі, а таксама чорна-зялёнымі сцягамі. Іх каля 40 чалавек. Усе ў чорнай форме, рэспіратарах і адгазніках, трымаюць у руках барабаны.

Анархісты ў Беларусі, як і партыя зялёных, найбольш актыўна і паслядоўна выступаюць супраць будаўніцтва АЭС.

Удзельнікі незарэгістраванай ініцыятывы "Правы альянс" усе як адзін прыйшлі на акцыю ў чорных акулярах, іх каля 20 чалавек.

Ёсць два сцягі АДС, сцягі "Маладой Беларусі", прысутнічаюць актывісты "Еўрапейскай Беларусі"..

Прысутнічае дэлегацыя з пасёлку Дружны, што пад Мінскам. Там, нагадаем, збіраюцца будаваць завод па перапрацоўцы ядахімікатаў. Яны трымаюць у руках расцяжкі: "Нет заводу ядохимикатов в 25 км от Минска", "Нет химическому Чернобылю".

Ёсць расцяжка Партыі БНФ, прысутнічае "Моладзь БНФ".

"Малады фронт" схадзіў да Чарнобыльскай капліцы а 10-й, таму акцыю ігнаруе. Ну і кіраўніцтва МФ, як вядома, выступае за будаўніцтва АЭС.

Грае музыка. Гучыць "Народны альбом".
Пачаўся Чарнобыльскі шлях
Ад 13-й гадзіны аргкамітэт акцыі плануе выстраіць ланцужок удзельнікаў «Чарнобыльскага шляху» ад Акадэміі навук да плошчы Якуба Коласа.

«Гэтым ланцужком мы пройдзем па запланаваным намі маршруце: па праспекце Незалежнасці, плошчы Якуба Коласа, вуліцах Веры Харужай, Багдановіча, Кульман, Карастаянавай да Чарнобыльскай капліцы», — заявіў на прэс-канферэнцыі ў чацвер намеснік старшыні партыі БНФ Віктар Івашкевіч.

Мінгарвыканкам прапанаваў арганізатрам правесці калону дэманстрантаў ад будынка Акадэміі навук каля кінатэатра «Кастрычнік» па вуліцах Хмяльніцкага, Куйбышава, Сурганава на плошчу Бангалор да Чарнобыльскай капліцы. Пры гэтым міліцыя абавязвалася забяспечыць бесперашкодны рух удзельнікаў акцыі па пераходах, абмежаваўшы рух транспарту.

Глядзі таксама:
Фотарэпартаж Юліі Дарашкевіч

Глядзі таксама:
Фотарэпартаж Сямёна Печанка

Зміцер Панкавец

0
Маладафронтавец / Адказаць
26.04.2009 / 13:31
[так, дзякуй, выправім -- вэб-рэдактар]
0
Менчук / Адказаць
26.04.2009 / 13:48
Вось толькі што адышоў ад калёны, але чаму на фота толькі рускамоўныя надпісы?
0
Думаю / Адказаць
26.04.2009 / 14:29
І што ж з "Народнага альбому" гучала на жалобным мітынгу? "Эх змагаліся мы, эх стаміліся..."? Тады трапна. Але як жа сорамна за вас, "арганізатары"!
Паказаць усе каментары/ 33 /
Каб пакінуць каментар, калі ласка, актывуйце JavaScript у наладах свайго браўзеру