Дзяржпамежкамітэт апублікаваў відэа надгляду аўтамабіля амбасадара Украіны Ігара Кізімы пасля перасячэння ўкраінска-беларускай мяжы.
Згодна з Венскай канвенцыяй аб дыпламатычных зносінах, асабісты багаж консульскіх службовых асоб і членаў іх сем'яў, якія пражываюць разам з імі, вызваляецца ад надгляду. Ён можа быць дагледжаны толькі ў выпадку, калі ёсць сур'ёзныя падставы меркаваць, што ў ім знаходзяцца прадметы, не прызначаныя для асабістага карыстання консульскай службовай асобай або членамі яго сям'і, якія пражываюць разам з ім. Такі надгляд павінен праводзіцца ў прысутнасці адпаведнай консульскай службовай асобы або члена яго сям'і.
На відэа супрацоўнік памежнага пропуска «Новая Гута» папярэджвае пасла, што ў адпаведнасці з заканадаўствам на яго ўскладзены абавязкі па ажыццяўленні памежнага кантролю, у тым ліку агляд транспартнага сродку.
На што Ігар Кізіма нагадвае, што ў сувязі з Венскай канвенцыяй агляд асабістага багажу дыпламата пры перасячэнні мяжы краіны, дзе ён працуе, не дазваляецца, калі няма важкіх прычын.
— Так, таму асабісты ваш багаж мы аглядаць не хочам, мы прапануем вам проста адкрыць заднія дзверы аўтамабіля, мы агледзім багажнік. Асабістыя рэчы мы даглядаць не збіраемся, — сказаў памежнік.
Пасол пагадзіўся адкрыць багажнік, але папярэдзіў, што напіша ноту, і папярэдзіў пра «дыпламатычную вайну».
