Удзельнікам дэлегацыі будзе таксама міністр замежных справаў Сяргей Мартынаў.
Кіраўнік прэс‑службы Аляксандра Лукашэнкі Павал Лёгкі
не пацвердзіў «Свабодзе» інфармацыю з Чэхіі аб тым, што беларускую дэлегацыю на саміце 7 траўня ў Празе ўзначаліць У.Сямашка.
«Я пакуль не чуў публічна абвешчанага рашэння. Якое будзе рашэнне — не ведаю, можа, прэзідэнт скажа аб гэтым. Пакуль я не ведаю, хто канкрэтна паедзе ў Прагу, у мяне такой інфармацыі няма. Публічна гэтае прозвішча пакуль не называлася».
Прэс‑сакратар беларускага ўраду Аляксандр Цімашэнка не пацвердзіў і не абвергнуў гэтую інфармацыю. У МЗС Беларусі таксама інфармацыю пакуль не каментуюць.
Еўрасаюз паслаў агульныя запрашэнні на саміт для шасці постсавецкіх краінаў‑удзельніц Усходняга партнёрства, пакідаючы справу персанальнага складу дэлегацый для вырашэння самім зацікаўленым краінам. У выпадку Беларусі Брусель неаднаразова рабіў намёкі, што прыезд Аляксандра Лукашэнкі ў Прагу быў бы вельмі нязручны для іншых удзельнікаў саміту.
