Міністэрства замежных спраў Літвы заявіла, што сцверджанні кіраўніка Службы знешняй разведкі РФ аб уплыве амерыканцаў і літоўцаў на пратэсты ў Беларусі не маюць ніякай фактычнай падставы і з'яўляюцца ілжывай прапагандай, піша delfi.lt.
«Такія гісторыі, якія ствараюцца Расіяй, мы чуем ужо на працягу шасці гадоў — з часоў Майдану ў Кіеве. Мы сумняваемся, што самі аўтары гэтых сцверджанняў вераць у іх», — заявіў МЗС Літвы. Літоўская дыпламатычная служба падкрэсліла, што менавіта Расія актыўна ўмешваецца ва ўнутраныя справы суседняй краіны.
«Пакуль свет бачыў толькі «зялёных чалавечкаў» і «незалежных» журналістаў, адпраўленых працаваць на беларускае тэлебачанне замест тых, хто адмовіўся працаваць на рэжым», — сцвярджае МЗС.
Гэты каментар МЗС Літвы апублікаваў пасля просьбы BNS пракаментаваць сцверджанні дырэктара Службы знешняй разведкі Сяргея Нарышкіна аб тым, што нібыта ЗША праз НДА рыхтавалі актывістаў у Літве, Польшчы, Украіне.