Сёння памерла маці 17-гадовага Цімура М. Таццяна. Нагадаем, падлетак пасля пратэстаў трапіў у рэанімацыю, а затым уцёк з бальніцы. Сіротамі засталіся дзевяць дзяцей, сямёра з іх непаўналетнія. Самога Цімура да гэтага часу не знайшлі. Таццяна, маці Цімура, памерла на 45-м годзе жыцця, у яе былі праблемы са здароўем.
Нагадаем, 13 жніўня Цімур трапіў у рэанімацыю 3-й дзіцячай бальніцы Мінска. Яго даставілі ў бальніцу з РУУС. Хлопец у бальніцы знаходзіўся нейкі час у медыкаментознай коме.
3 верасня падлетка затрымалі і адвезлі на допыт у рамках арт. 293 КК (Масавыя беспарадкі). Следчыя заявілі, што падлетак актыўна ўдзельнічаў у масавых беспарадках і датычны да ўзброенага нападу на кіроўцу грузавога аўтамабіля МАЗ. Па словах следчых, малады чалавек ёсць на запісах камер відэаназірання на вуліцы Прытыцкага 10 жніўня, дзе праходзілі акцыі пратэсту.
3 верасня ў СК маладому чалавеку стала дрэнна — яго адправілі ў бальніцу. Нейкі час ён правёў у рэанімацыі, а ў дзень знікнення яго перавялі ў звычайную палату. Выпісваць яго на той момант яшчэ не збіраліся, распавялі блізкія хлопца. Па звестках сваякоў, на камерах відэазапісу відаць, што Цімур сустрэўся ў бальніцы з дзяўчынай у белым плашчы, акулярах і з мядзведзем у руках.
