Сёння прыкладна а 18-ай ў 104-ым мікрараёне Гомеля праходзіў ператрус у доме шматдзетнай сям'і. Пару не толькі абвінавачваюць у адміністрацыйным правапарушэнні, але і завялі крымінальную справу. Як «Моцным Навінам» распавяла Наталля Сняжкова, у нядзелю 27 верасня прыкладна ў 21.50 затрымалі яе мужа. На наступны дзень яго асудзілі за ўдзел у акцыі на 14 сутак і адправілі ў ІЧУ.
Па гэтым самым артыкуле склалі пратакол і на Наталлю — маці пяцярых дзяцей.
Сёння днём у школу да яе дачкі прыходзілі супрацоўнікі праваахоўных органаў. Па словах маці, 11-гадовае дзіця апытвала міліцыя ў прысутнасці настаўніка і сацыяльнага педагога. Што пыталіся — невядома.
Пазней у РАУС на размову выклікалі і саму жанчыну, аднак яна папрасіла супрацоўнікаў прыехаць да яе дадому. Яны і прыехалі з ператрусам.
Наколькі вядома «Моцным Навінам», у дачыненні кагосьці з членаў сям'і заведзена крымінальная справа па артыкуле 363 частка 2 — супраціў супрацоўніку органаў унутраных спраў, спалучаны з ужываннем гвалту або з пагрозай яго прымянення. Санкцыя гэтага артыкула прадугледжвае пазбаўленне волі на тэрмін да 5 гадоў.
Пасля ператрусу жанчыну затрымалі. Яе непаўналетніх дзяцей адвезлі ў сацыяльны цэнтр. Апекуном можна было б прызначыць старэйшага брата, калі б не адно «але» — ён беспрацоўны. Дзяцей яму аддадуць, толькі пасля таго, як ён уладкуецца на працу.
