У Беларусі пачынаецца чарговы прызыў грамадзян на тэрміновую вайсковую службу і службу ў рэзерве.
Ён рэгламентаваны ўказам прэзідэнта № 228, падпісаным 5 мая, а таксама загадам міністра абароны, які з’явіцца пазней.
У адпаведнасці з прэзідэнцкім указам прызыву ў маі‑верасні 2009 года на тэрміновую вайсковую службу, службу ў рэзерве падлягаюць грамадзяне Беларусі мужчынскага полу,
якім да дня прызыву споўнілася 18 гадоў і якія не маюць права на адтэрміноўку ад прызыву, а таксама грамадзяне прызыўнога ўзросту, якія страцілі права на адтэрміноўку.Яны павінны быць накіраваны ва Узброеныя сілы, іншыя войскі і воінскія фарміраванні да 30 верасня.
Указам устаноўлена, што пацярпелыя ад наступстваў катастрофы на Чарнобыльскай АЭС грамадзяне, прызваныя на тэрміновую вайсковую службу, накіроўваюцца ў воінскія часці і фарміраванні, якія не знаходзяцца на радыеактыўна забруджаных тэрыторыях, і прызначаюцца на ваенныя пасады, не звязаныя з работамі па эксплуатацыі крыніц іянізуючага выпраменьвання, звышвысокіх частот і з кампанентамі ракетнага паліва.
Колькі грамадзян будзе прызвана на тэрміновую службу і службу ў рэзерве, у прэс‑службе Міністэрства абароны сказаць пакуль не змаглі. Па вопыце мінулых гадоў гэта можа быць каля 10 тыс. і 3 тыс. адпаведна.
Адмысловы від службы — служба ў рэзерве — рэалізуецца ў Беларусі з 2004 года, тады былі прызваныя першыя 820 рэзервістаў. У наступныя гады было прызвана прыкладна па 3 тыс. чалавек.
На службу ў рэзерве прызываюцца, як правіла, тыя юнакі, якія ўяўляюць інтарэс для дзяржавы ў сферы навукі, культуры, мастацтва, спорту, высокакваліфікаваныя рабочыя, спецыялісты, занятыя ў сельскай гаспадарцы.
