Нагадаем, што не так даўно стала вядома, што лепшую спартсменку мінулага года, чэмпіёнку свету па фрыстайле Аляксандру Раманоўскую звольнілі з нацыянальнай каманды «за прагулы», хаця ў яе была форс-мажорная сітуацыя: бацька спартсменкі перанёс інсульт, не было каму вазіць яго ў бальніцу, гэтым займалася Аляксандра.
У Рэспубліканскім цэнтры алімпійскай падрыхтоўкі на гэта не звярнулі ўвагі, хаця ўсім было зразумела, што насамрэч Раманоўскую звольнілі за яе актыўную грамадзянскую пазіцыю.
Загад уступіць у сілу 16 кастрычніка, але рашэнне РЦАП будзе аспрэчвацца.
Акрамя таго, раней і галоўнага трэнера зборнай Беларусі Мікалая Казеку пазбавілі прэзідэнцкай стыпендыі. Ён таксама асудзіў гвалт на вуліцах Беларусі пасля выбараў.
— На гэтым тыдні Сашы зрабілі аперацыю, — распавёў «Народнай Волі» Мікалай Казека. — Дактары, якія яе праводзілі, кажуць, што ўсё прайшло паспяхова. Гэта была такая касметычная аперацыя, быў рубец на каленным суставе, і яго, так бы мовіць, нівеліравалі.
— Колькі часу працягнецца рэабілітацыя?
— Пакуль нічога не вядома, медыкі будуць адштурхоўвацца ад таго, як пойдзе працэс аднаўлення.
— Улічваючы, што Сашу звольнілі, якія яе далейшыя спартыўныя перспектывы?
— Пакуль яна знаходзіцца на бальнічным, а далей пабачым, што будзе. Хацелася б верыць у лепшае.
— Вас пазбавілі прэзідэнцкай стыпендыі, і грошы за пэўны перыяд вы павінны вярнуць дзяржаве. Якая гэта сума?
— Дакладна не ведаю, бо пакуль гэты працэс ідзе, і не хочацца бегчы наперадзе цягніка.
— Як цяпер працуецца ў свеце апошніх падзей?
— Працуем у штатным рэжыме, цяпер крыху сітуацыя супакоілася.
— Ведаю, што на гэтым тыдні да вас прыязджаў і алімпійскі чэмпіён Антон Кушнір, які зараз працуе трэнерам са зборнай Казахстана. Вучань вырашыў падтрымаць настаўніка?
— Антон цяпер насамрэч у Мінску. Тут і пандэмія паўплывала, і аперацыю трэба было рабіць з-за старых траўм. А заходзіў да мяне ў госці акурат пасля свайго дня нараджэння. Прынёс сок, торт, сушы, душэўна пасядзелі. Нам было пра што пагаварыць…
