«Праверка ўцечкі звестак»: жыхар Магілёва стаў ахвярай новай схемы кібермахлярства і страціў 300 рублёў
Пра выпадак піша ў сваім тэлеграм-канале СК.
37-гадовы магілёвец зарэгістраваўся на сайце нібыта Фонду абароны персанальных звестак. Арганізацыя прапаноўвала ўсім ахвотным прайсці працэдуру праверкі на прадмет уцечкі сваіх асабістых звестак у інтэрнэт.
Вынік «праверкі» афармляўся справаздачай, дзе паказвалася, якая менавіта асабістая інфармацыя выкарыстоўвалася трэцімі асобамі, а таксама магчымасць атрымання ў сувязі з гэтым грашовай кампенсацыі.
Пацярпеламу паведамілі, што ў сувязі з уцечкай яго асабістых звестак яму будзе кампенсацыя больш за 1200 даляраў ЗША, аднак для гэтага неабходна аплаціць страхоўку і іншыя паслугі, звязаныя з пераводам на яго рахунак грошай.
У выніку мужчына перавёў невядомай асобе больш за 300 рублёў, пасля чаго з ім перасталі выходзіць на сувязь.
Заведзена крымінальная справа па ч. 1 арт. 209 (махлярства) Крымінальнага кодэкса.
Следчыя нагадваюць грамадзянам аб неабходнасці быць больш пільнымі і не паддавацца на хітрыкі ашуканцаў!
Каментары