12.05.2009 / 10:47

БХД не зарэгістравалі 3

12 траўня Міністэрства юстыцыі прыняло рашэнне не рэгістраваць партыю Беларуская хрысціянская дэмакратыя.

12 траўня Міністэрства юстыцыі прыняло рашэнне не рэгістраваць партыю Беларуская хрысціянская дэмакратыя.

Як паведамляе Мін’юст, падчас вывучэння дакументаў, якія падаваліся для рэгістрацыі, было знойдзена, што спіс заснавальнікаў і пратакол устаноўчага з’езду маюць несапраўдныя звесткі. Міністэрства зазначае, што ў лік заснавальнікаў ёсць асобы, якія не прымалі ўдзел у зборах па вылучэнні дэлегатаў на з’езд і ў працы самога з’езду.

Шэраг сяброў БХД не змаглі назваць месца і дату правядзення збораў, на якіх яны прысутнічалі, колькасць удзельнікаў, а таксама каго яны абралі ў якасці дэлегатаў на з’езд.

«Нехта з супрацоўнікаў Міністэрства тэлефанаваў заснавальнікам БХД і задаваў блізу 10‑15 пытанняў адносна правядзення з’езду. Вось пытаюцца: колькі было чалавек на пасяджэнні ў вашым раёне? Кажаце, дваццаць? Але ж іх было трыццаць. А колькі чалавек вылучалі на з’езд? Чатыры? А па дакументах пяць. Вось на такіх рэчах і была абгрунтавана адмова», — расказваў сустаршыня БХД П.Севярынец.

«Любы чалавек праз два месяцы пасля партыйных сходаў можа забыцца, колькі чалавек на ім прысутнічалі і колькі вылучалася на з’езд,
— кажа іншы сустаршыня БХД Аляксей Шэін. — Шмат да каго на працу прыходзілі супрацоўнікі спецслужбаў і чыноўнікі, якія ставілі ўмову альбо подпіс заснавальніка, альбо праца. Напрыклад, такую ўмову паставілі шматдзетнай маці. Усё гэта рабілася для таго, каб мець фармальныя прычыны для нашай нерэгістрацыі».

Нагадаем, што БХД ужо адмаўлялі ў рэгістрацыі 15 красавіка, але на наступны дзень раптоўна гэтае рашэнне было прыпыненае. Шмат хто гэта звязваў з прыездам у Мінск міністра замежных спраў Чэхіі Карэла Шварцэнберга.

«Аргкамітэт БХД будзе працягваць сваю працу як і раней.

Думаю, што рашэнні аб рэгістрацыі партый выходзяць за рамкі той касметычнай лібералізацыі, якая ў нас адбываецца»,
— кажа А.Шэін.

Цягам месяцу партыя мае права абскардзіць рашэнне ў Вярхоўным судзе, што і збіраецца зрабіць, хоць вялікіх ілюзій на гэты конт ніхто не мае. «Пазней прымем рашэнне, ці праводзіць новы устаноўчы з’езд, бо настрой Мін’юсту нам і так зразумелы», — падсумоўвае А.Шэін.

Зміцер Панкавец

0
Jeż Jerzy / Адказаць
12.05.2009 / 11:31
Можа годзе нашым халтурыць?
0
Homo habilis / Адказаць
12.05.2009 / 12:47
Калі вядома Што пытаюць, дык чаму не паведаміць усім дэлегатам неабходныя адказы: колькі, дзе, калі, хто быў вылучаны? Ці па меркаваньню бхдоўцаў гэта не вежна?
0
шматдзетны бацька / Адказаць
12.05.2009 / 22:40
ёсьць зусім іншы мэтад: не адказваць на пытаньні па тэлефонах увогуле. адзінае, што варта казаць: дакумэнты мы вам падалі, усе неабходныя зьвесткі там і знойдзеце, усяго добрага. і кропка. альбо адказваць у пісьмовым выглядзе на пісьмовыя запыты. тады лягчэй пазьбегнуць рознагалосьсяў. няхай у мінюсьце чытаюць падрыхтаваныя загадзя калькі адказаў на іх пытаньні
Каб пакінуць каментар, калі ласка, актывуйце JavaScript у наладах свайго браўзеру