Шэраг безыменных сквераў і паркаў у Мінску атрымалі назву.
Як паведамілі БелаПАН у прэс‑службе Мінгарвыканкама, такое рашэнне на пасяджэнні 6 мая прыняла Камісія па найменаванні і перайменаванні праспектаў, вуліц і іншых частак Мінска.
Безыменны сквер у межах пр.Машэрава — вул.Куйбышава — тэрыторыя Галоўнага ваеннага шпіталя Міністэрства абароны будзе звацца сквер «Шпітальны».
Безыменны сквер у межах вул.В.Харужай — ТЦ «Люстэрка» — Дом мэблі названы скверам «Камароўскі».
Безыменны сквер каля каледжа фінансаў і банкаўскай справы па вул.Чырвонай, 17 у будзе звацца скверам «Чырвоны». Безыменны сквер у межах вуліц Купрыянава — К.Лібкхнехта — зав.Дамашэўскі цяпер завецца сквер «Лютэранскі». Гэты сквер з`явіўся на месцы знесеных у 1970‑я гады Лютэранскіх могілак, што існавалі ў Мінску з сярэдзіны 19‑га стагоддзя.
Безыменны сквер у межах вул.Купрыянава — жылая забудова — вул.Волаха будзе называцца сквер «Маламядзвежынскі». Гэты сквер з`явіўся на месцы вёскі Малое Мядзведзіна, якая знікла з карты гораду ў 1970‑я гады.
Камісія таксама вырашыла прысвоіць назву безыменнаму скверу ў межах вул.Кальварыйскай — праездам Кальварыйскім і могілкамі «Кальварыя» — сквер «Кальварыйскі».
Безыменнаму скверу ў межах выканкама Мінскага раёна — вуліц Альшэўскага і Кальварыйскай — сквер «Альшэўскі». Сквер зявіўся на месцы знесенай у 1960‑я гады вёскі Ольшава.
Здабыў сваю назву і сквер у межах вул.Куйбышава — Э.Пашкевіч — М.Багдановіча — Янкі Купалы — «Траецкая гара». Траецкая гара — гістарычная назва былой плошчы, якая знікла ў 1930‑я гады пасля таго як на ёй пабудавалі Нацыянальны акадэмічны Вялікі тэатр оперы і балета Беларусі.
Свае назвы атрымалі зоны адпачынку, што праектуюцца. Запраектаваны парк у мікрараёне «Сухарава‑5» каля рэчкі Качынка будзе звацца парк «Дзівівелка». На тэрыторыі будучага парка знаходзіцца абмялелая рэчка, якая ў старыя часы мела назву Дзівівелка.
Паркавая зона ў складзе ландшафтна‑рэкрэацыйных тэрыторый уздоўж ракі Свіслач, у межах вул.Камуністычная — вул.Старажоўская — рака Свіслач будзе звацца сквер «Старосцінская слабада». Старосцінская слабада — гэта назва старажытнага мінскага прадмесця, якое існавала на гэтым месцы ў 16‑м — першай палове 20‑га стагоддзя. Стараста ў гады Вялікага княства Літоўскага — службовая асоба, якая кіравала адміністрацыйнай акругай. На гэтым месцы ў 16—18 стагоддзі пражывалі людзі, якія арандавалі ў мінскага старасты зямлю.
