Трагікамічную гісторыю, якая адбылася сёння ў раёне станцыі метро «Пушкінская», расказала «Нашай Ніве» выкладчыца Таццяна. Разам з кампаніяй незнаёмцаў яны ратаваліся ад АМАПа — а трапілі на вяселле.
«Я з сябрам гуляла на Пушкінскай, пачаліся разгоны. Мы то выходзілі да праспекта, то нас гналі назад. У адзін з такіх момантаў з суседняга дома выйшла дзяўчына, уся ў хатнім, з мокрай галавой, сказала, што вельмі хвалюецца, маўляў, калі што — заходзьце ў пад’езд.
Мы тады не пайшлі, але тут АМАП пабег на людзей, людзі пачалі адыходзіць, а потым уцякаць. Мы забеглі ў гэты пад’езд, а ззаду ўжо бег АМАП. З пад’езда нас запусцілі ў гэтую кватэру. Нас набілася чалавек 15, АМАП быў ужо ў пад’ездзе. Падалося, што нават па дзвярах ляпнулі палкай.
Спачатку мы сядзелі ціха, як мышы. У кватэры былі трое ўжо сталых людзей, а таксама дзве маладыя пары. Прапанавалі шампанскага. З чаго б?
Аказалася, мы трапілі на другі дзень вяселля, і гаспадары як бы святкавалі. Выпілі «за маладых», нажадалі ім усяго самага лепшага ў новай, свабоднай краіне.
Але амаль увесь час, пакуль мы там былі, натуральна, гаварылі пра тое, што адбываецца на вуліцы і на плошчы Перамен, глядзелі відэа.
Потым, калі стала ясна, што АМАП сышоў са двара, мы павыходзілі», — расказала Таццяна.