«Мы былі на плошчы Перамен, а пасьля вырашылі пайсьці ў «Гіпа» ў прыбіральню і пагрэцца. Там хвілін 15 ужо стаялі ў чарзе, калі пачулі гукі сьвятлошумавых гранат на вуліцы, — распавядае ён. — Я выйшаў, і там ужо было мора сілавікоў у чорным. Людзі стаялі ля крамы і грукалі па мэталічнай паверхні. Калі сілавікі пабеглі ў бок гіпэрмаркета, людзі запанікавалі, сталі забягаць у краму. І я таксама зайшоў», цытуе Радыё Свабода.
Далей, кажа хлапец, ужо адбывалася тое, што відаць на відэа.
«Заляцеў спачатку адзін у чорным, як ашалелы, пачаў зьбіваць і круціць хлопца. А пасьля забеглі яшчэ чалавек шэсьць, наляцелі на мяне, на мужчыну побач, — згадвае хлапец. — Пачалася нейкая сеча, у якой не разумеў нічога, я хапаў мужчыну за руку каб быць разам, чапляўся за мэталічную агароджу, а яны працягвалі дубінамі зьбіваць мяне і людзей побач. Мяне схапілі за каўнер і я ўжо недзе ўнутры адчуваў быццам хана будзе, быццам мяне ўжо амаль нясуць у пекла.
Але я трымаўся да апошняга, людзі дапамагалі, жанчыны здаецца крычалі: «Ня біце, спыніцеся». Пасьля памятаю што я на падлозе, мяне адзін з нападнікаў цягне за нагу, я чапляюся за ногі людзей, за што трапляецца».
Хлапцу пашанцавала — сілавікі сышлі з крамы, не затрымаўшы яго. Але на галаве засталіся раны. Яму на дапамогу прыйшлі мэдыкі, якія апынуліся побач, — прынесьлі бінты, прамылі параненую галаву.
Хлапец зьвярнуўся ў шпіталь. Кажа, што давялося доўга сядзець у чарзе. Яму наклалі 3 швы і паставілі дыягназ ЧМТ. Ад шпіталізацыі ён адмовіўся. Яшчэ кажа, што ў яго моцна баліць нага — «уся сіняя, і хадзіць цяжка».
«Пакуль я сядзеў 3 гадзіны ў шпіталі, прывозілі іншых людзей у дрэнным стане, зламанымі і зьбітымі, — кажа хлапец. — А вахцёрка, жанчына сталага веку, увесь час чаплялася да людзей і лаялася, казала, што на месцы прэзыдэнта страляла б іх на месцы ўсіх».
