Мастоўскі райвыканкам не плануе рабіць беларускамоўную версію свайго сайта, хоць гэта і прадугледжваецца рэгламентам інфармацыйнага напаўнення афіцыйнай інтэрнэт-старонкі.
Старшыня Мастоўскага райвыканкама Аляксей Шафарэвіч у сваім расейскамоўным адказе на беларускамоўны зварот сябра Рады руху «За Свабоду» Алеся Зарэмбюка паведаміў, што асноўнай версіяй афіцыйнага сайту мясцовых уладаў з’яўляецца рускамоўная. Чыноўнік у сваім лісце спасылаецца на нарматыўныя дакументы і кантэнт сайтаў іншых раёнаў Гарадзеншчыны, якія, паводле ягоных слоў, змяшчаюць інфармацыю па-руску.
Паводле Шафарэвіча, рэгламент інфармацыйнага напаўнення афіцыйнай інтэрнэт-старонкі прадугледжвае размяшчэнне інфармацыі па-беларуску і па-ангельску, але пераклад асноўнай (расейскамоўнай) версіі сайта на мову тытульнай нацыі не плануецца.
Такім чынам, спраўджваюцца самыя песімістычныя прагнозы мовазнаўцаў: наданне расейскай мове статуса дзяржаўнай нароўні з беларускай прывяло да выцяснення апошняй не толькі з паўсядзённых стасункаў паміж людзьмі, са сфер адукацыі, навукі, культуры, але нават з афіцыйных дачыненняў дзяржавы і грамадзяніна. Калі чыноўнік не здольны выказаць свае думкі на дзяржаўнай мове, калі суддзя пераносяць разгляд справы з прычыны неразумення мовы тытульнай нацыі, — сітуацыя немагчымая ў любой іншай краіне — у Беларусі выглядае як норма.
